លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាំយកអំណោយ និងអាហារូបករណ៍ ជួយអ្នកធាក់ស៊ីក្លូ មុនចូលឆ្នាំថ្មី

(ភ្នំពេញ)៖ នាព្រឹកថ្ងៃទី១២ ខែមេ សា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា បានអញ្ជើញជាអធិបតីក្នុងកម្មវិធីសប្បុរសធម៌ ដើម្បីចុះសាកសួរសុខទុក្ខ និងស្វែងយល់អំពីជីវភាពរស់នៅរបស់បងប្អូនប្រកបរបរធាក់ស៊ីក្លូ ដែលជាសមាជិកសមាគមមូលនិធិត្រីចក្រយានកម្ពុជា។

ក្នុងឱកាសនោះ លោកជំទាវបណ្ឌិត បានពាំនាំនូវប្រសាសន៍សួរសុខទុក្ខដោយក្តីនឹករលឹក និងការយកចិត្តទុកដាក់យ៉ាងជ្រាលជ្រៅពីសំណាក់ សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត ជូនដល់សមាជិកទាំងអស់។

ជាមួយគ្នានេះ លោកជំទាវបណ្ឌិត ក៏បាននាំយកអំណោយជាថវិកា គ្រឿងឧបភោគបរិភោគ និងសម្ភារៈចាំបាច់ផ្សេងៗ ដែលជាអំណោយផ្ទាល់របស់សម្តេចធិបតី និងលោកជំទាវបណ្ឌិត ចែកជូនដល់សមាជិក ដើម្បីជួយសម្រួលជីវភាពប្រចាំថ្ងៃ និងអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងមកដល់ក្នុងពេលឆាប់ៗនេះ។

លើសពីនេះទៀត ដើម្បីលើកកម្ពស់ការអភិវឌ្ឍធនធានមនុស្សកម្ពុជា លោកជំទាវបណ្ឌិត បានប្រកាសផ្តល់អាហារូបករណ៍ថ្នាក់បរិញ្ញាបត្រ និងបរិញ្ញាបត្ររង តាមរយៈសមាគមសិស្ស-និស្សិតអាហារូបករណ៍សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់កូនចៅរបស់សមាជិកសមាគមមូលនិធិត្រីចក្រយានកម្ពុជា ដើម្បីជាការចូលរួមបង្កើនគុណភាពធនធានមនុស្ស និងអនាគតប្រទេសជាតិ៕