ក្លែងជាផ្កាយ២ បោកប្រាក់រត់ការចូលប៉ូលិស! ត្រូវសមត្ថកិច្ចចាប់ខ្លួន

(ភ្នំពេញ)៖ នាយកដ្ឋានប្រឆាំងបទល្មើសបច្ចេកវិទ្យា បានបើកប្រតិបត្តិការបង្ក្រាប និងឃាត់ខ្លួនជនសង្ស័យម្នាក់ ពាក់ព័ន្ធករណីក្លែងបន្លំជាមន្រ្តីនគរបាលជាតិ ឋានន្តរស័ក្តិឧត្តមសេនីយ៍ទោ (ផ្កាយ២) ដើម្បីឆបោកប្រាក់ជនរងគ្រោះ ក្រោមរូបភាពរត់ការចូលក្របខណ្ឌនគរបាលជាតិ។

ប្រតិបត្តិការនេះអនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងការណែនាំពីថ្នាក់ដឹកនាំពាក់ព័ន្ធ ដោយបានចាប់ខ្លួនជនសង្ស័យឈ្មោះ សាន់ វិចិត្រ ភេទប្រុស ជនជាតិខ្មែរ កាលពីថ្ងៃទី០៩ ខែមេសា ឆ្នាំ២០២៦។

លទ្ធផលស្រាវជ្រាវបង្ហាញថា ជនសង្ស័យបានក្លែងតួនាទីជាអនុប្រធាននាយកដ្ឋានប្រឆាំងបទល្មើសបច្ចេកវិទ្យា និងប្រើល្បិចបោកបញ្ឆោតជនរងគ្រោះឱ្យជឿថាខ្លួនមានអំណាចអាចជួយរត់ការចូលបម្រើការងារនៅក្នុងក្របខណ្ឌនគរបាលជាតិបាន ដើម្បីទទួលប្រាក់ដោយខុសច្បាប់។

បច្ចុប្បន្ន ជនសង្ស័យត្រូវបានកសាងសំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ ខណៈអាជ្ញាធរអំពាវនាវឱ្យជនរងគ្រោះពាក់ព័ន្ធ មកដាក់ពាក្យបណ្ដឹង ដើម្បីទាមទារសំណងតាមច្បាប់៕