នារីហាយសូ បោកតុងទីនជិត១លានដុល្លារ ត្រូវឃាត់ខ្លួន ខណៈប៉ុនប៉ងរត់គេចក្រៅប្រទេស!

(ភ្នំពេញ)៖ នារីហាយសូស្រស់ស្អាតម្នាក់ ត្រូវបានមេតុងទីនឃាត់ខ្លួន ប្រគល់ជូនសមត្ថកិច្ចនគរបាលព្រហ្មទណ្ឌ ក្រសួងមហាផ្ទៃ បន្ទាប់ពីពាក់ព័ន្ធករណីឆបោក និងរំលោភលើទំនុកចិត្ត ក្នុងការលេងតុងទីន មានទឹកប្រាក់សរុបជិត១លានដុល្លារអាមេរិក។

យោងតាមពាក្យបណ្តឹងរបស់ជនរងគ្រោះ៣នាក់ ចុះថ្ងៃទី៩ ខែមេសា ឆ្នាំ២០២៦ បានឱ្យដឹងថា ស្ត្រីឈ្មោះ លី លីនដា (Kelly Kelly) បានចូលរួមលេងតុងទីនចំនួន៣០ខ្សែ ហើយដេញយកប្រាក់គ្រប់ខ្សែ ប៉ុន្តែមិនបានបង់ប្រាក់ត្រឡប់វិញ សរុបចំនួន ៩៦៦,៧០០ដុល្លារ។

ក្នុងនោះ រួមមានការដេញពីមេតុងទីន៣រូប គឺ៖ រស្មី សុភា និងគន្ធា ដែលមានទឹកប្រាក់រាប់សែនដុល្លារ ត្រូវបានយកទៅដោយគ្មានការសងវិញ។

ប្រភពដដែលបន្តថា កាលពីថ្ងៃទី៧ ខែមេសា ឆ្នាំ២០២៦ ស្ត្រីរូបនេះបានប្រើល្បិចភូតកុហកថា ត្រូវបានសមត្ថកិច្ចឃាត់ខ្លួនពាក់ព័ន្ធបទល្មើសផ្សេងៗ ហើយបានខ្ចីប្រាក់បន្ថែមចំនួន ១៥០,០០០ដុល្លារ ដើម្បីដោះស្រាយបញ្ហា ប៉ុន្តែបន្ទាប់ពីស៊ើបអង្កេត ទើបដឹងថា ព័ត៌មាននោះគ្រាន់តែជាការបោកប្រាស់ប៉ុណ្ណោះ។

លុះដល់ថ្ងៃទី៩ ខែមេសា ឆ្នាំ២០២៦ ខណៈពេលស្ត្រីរូបនេះប៉ុនប៉ងឡើងយន្តហោះរត់គេចទៅក្រៅប្រទេស ត្រូវបានជនរងគ្រោះនាំខ្លួនប្រគល់ឲ្យសមត្ថកិច្ច ដើម្បីចាត់ការតាមនីតិវិធីច្បាប់។

បច្ចុប្បន្ន ស្ត្រីឈ្មោះ លី លីនដា កំពុងស្ថិតក្រោមការស៊ើបអង្កេត និងអនុវត្តនីតិវិធីតាមច្បាប់របស់សមត្ថកិច្ច៕