រដ្ឋមន្ត្រី នេត្រ ភក្ត្រា ជំរុញមន្ត្រីព័ត៌មានខេត្តតាកែវ បង្កើនគុណភាព និងភាពជឿជាក់ក្នុងការផ្សព្វផ្សាយព័ត៌មាន

(តាកែវ)៖ ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន បានធ្វើការលើកទឹកចិត្តដល់ថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្តតាកែវទាំងអស់ ឱ្យបន្តប្រឹងប្រែងអនុវត្តភារកិច្ចរបស់ខ្លួនឱ្យកាន់តែមានប្រសិទ្ធភាពខ្ពស់ សកម្មភាពកាន់តែខ្លាំង និងមានវិជ្ជាជីវៈខ្ពស់ជាងមុន ដើម្បីបង្កើនភាពជឿទុកចិត្តពីថ្នាក់ដឹកនាំខេត្ត និងប្រជាពលរដ្ឋលើការផ្សព្វផ្សាយព័ត៌មាន។

ការលើកឡើងនេះ ត្រូវបានធ្វើឡើងនៅថ្ងៃសៅរ៍ ទី១១ ខែមេសា ឆ្នាំ២០២៦ ក្នុងឱកាសដែលឯកឧត្ដមរដ្ឋមន្ត្រី បានអញ្ជើញចុះជួបសំណេះសំណាល និងសួរសុខទុក្ខ ដល់ថ្នាក់ដឹកនាំ និងមន្ត្រីរាជការ នៃមន្ទីរព័ត៌មានខេត្តតាកែវ មុនពេលឱកាសបុណ្យចូលឆ្នាំថ្មីប្រពៃណីជាតិមកដល់។

ក្នុងឱកាសដ៏មានអត្ថន័យនេះ ឯកឧត្ដមរដ្ឋមន្ត្រី នេត្រ ភក្ត្រា បានផ្តល់អនុសាសន៍ណែនាំដ៏សំខាន់ ដោយអំពាវនាវឱ្យមន្ត្រីទាំងអស់ ត្រូវពង្រឹងស្មារតីសាមគ្គីភាពផ្ទៃក្នុងឱ្យកាន់តែរឹងមាំ និងបង្កើនកិច្ចសហការរវាងគ្នាឱ្យមានប្រសិទ្ធភាពខ្ពស់។ ពិសេស ត្រូវយកចិត្តទុកដាក់លើការផ្សព្វផ្សាយព័ត៌មានឱ្យបានត្រឹមត្រូវ រហ័សទាន់ពេលវេលា និងមានភាពជាក់លាក់ ដើម្បីឆ្លើយតបតាមតម្រូវការរបស់សង្គម និងបង្កើនការជឿជាក់ពីសំណាក់ប្រជាពលរដ្ឋនៅក្នុងមូលដ្ឋាន។

ឯកឧត្ដមក៏បានបញ្ជាក់ថា ការផ្សព្វផ្សាយព័ត៌មានដែលមានគុណភាព និងភាពទាន់ពេលវេលា គឺជាចំណុចស្នូលសម្រាប់ការបង្កើនប្រសិទ្ធភាពការងារ និងការពង្រឹងទំនាក់ទំនងរវាងអាជ្ញាធរ និងប្រជាពលរដ្ឋ។

ឯកឧត្ដមរដ្ឋមន្ត្រី បានលើកទឹកចិត្តឱ្យមន្ត្រីទាំងអស់ បន្តអភិវឌ្ឍសមត្ថភាពវិជ្ជាជីវៈ និងប្តេជ្ញាចិត្តបំពេញភារកិច្ចរបស់ខ្លួនឱ្យបានល្អប្រសើរ ដើម្បីរួមចំណែកលើកកម្ពស់វិស័យព័ត៌មាននៅថ្នាក់មូលដ្ឋានឱ្យកាន់តែមានប្រសិទ្ធភាព និងភាពជឿជាក់ខ្ពស់បន្ថែមទៀត៕