បង្ក្រាបក្រុមឆបោកបន្លំជាភ្នាក់ងារធនាគារ បោកយកលុយតាមប្រព័ន្ធឌីជីថល ខ្ទង់ម៉ឺនដុល្លារ

(ភ្នំពេញ)៖ ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ កម្លាំងនាយកដ្ឋាននគរបាលព្រហ្មទណ្ឌ បានចុះអនុវត្តវិធានការជំនាញ បង្ក្រាបបានករណីឆបោកមានការរៀបចំជាក្រុម ដែលប្រើល្បិចបន្លំជាភ្នាក់ងារធនាគារ អេស៊ីលីដា ដើម្បីលួចយកប្រាក់ពីគណនីរបស់ប្រជាពលរដ្ឋ។

តាមរបាយការណ៍បានឲ្យដឹងថា នៅថ្ងៃទី២៩ ខែមីនា ឆ្នាំ២០២៦ ជនសង្ស័យបានទាក់ទងទៅជនរងគ្រោះ ដោយអះអាងថា ជាបុគ្គលិកធនាគារ អេស៊ីលីដា និងត្រូវការធ្វើបច្ចុប្បន្នភាពគណនី។ ជាមួយនឹងការប្រើពាក្យសម្តីបញ្ចេញភាពជឿជាក់ ជនសង្ស័យបានទាមទារព័ត៌មានសម្ងាត់មួយចំនួនពីជនរងគ្រោះ។ បន្ទាប់មក នៅវេលាម៉ោងប្រហែល ៥ល្ងាច ជនរងគ្រោះបានពិនិត្យគណនីរបស់ខ្លួន ហើយភ្ញាក់ផ្អើលឃើញថា ទឹកប្រាក់ត្រូវបានដកអស់ ខណៈលេខទូរស័ព្ទ និងគណនីត្រូវបានគ្រប់គ្រងដោយជនសង្ស័យ។

ក្រោមការដឹកនាំរបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងលោកឧត្តមសេនីយ៍ទោ ជាវ វិបុល ព្រមទាំងលោកឧត្តមសេនីយ៍ត្រី លន់ ចាន់ផាគែន អនុប្រធាននាយកដ្ឋាន កម្លាំងជំនាញបានបើកការស្រាវជ្រាវយ៉ាងម៉ត់ចត់ រហូតកំណត់អត្តសញ្ញាណជនសង្ស័យ និងស្នើសុំដីកាបញ្ជាឲ្យចូលខ្លួន។

លទ្ធផល នៅវេលាម៉ោង១០យប់ ថ្ងៃទី១០ ខែមេសា ឆ្នាំ២០២៦ សមត្ថកិច្ចបានឃាត់ខ្លួនជនសង្ស័យចំនួន៣នាក់ រួមមាន៖ *១. សៀម ដាណែត ភេទប្រុស អាយុ៤០ឆ្នាំ។*២. ខុន ប្រុសពេជ្រ ភេទប្រុស អាយុ២៥ឆ្នាំ។*៣. សាត វណ្ណី ភេទប្រុស អាយុ៣០ឆ្នាំ

តាមចម្លើយសារភាព ជនសង្ស័យបានប្រើប្រាស់បច្ចេកទេសលួចយកលេខសម្ងាត់ (OTP) ដោយបោកបញ្ឆោតជនរងគ្រោះឲ្យគណនាលេខ៦ខ្ទង់តាមរូបមន្តបំភាន់ (គុណនឹង៦ ហើយចែកនឹង១០០) រួចផ្ញើលទ្ធផលឲ្យពួកគេ។ បន្ទាប់មក ជនសង្ស័យយកលទ្ធផលនោះទៅធ្វើវិធីសាស្ត្រត្រឡប់វិញ ដើម្បីទាញយកលេខសម្ងាត់ពិត និងចូលគ្រប់គ្រងគណនីជនរងគ្រោះដោយជោគជ័យ។

សមត្ថកិច្ចបញ្ជាក់ថា ក្រុមជនសង្ស័យនេះជាមុខសញ្ញាចាស់ ដែលធ្លាប់ប្រព្រឹត្តសកម្មភាពឆបោកជាបន្តបន្ទាប់ បង្កការខាតបង់ទ្រព្យសម្បត្តិប្រជាពលរដ្ឋសរុបជាទឹកប្រាក់ខ្ទង់ម៉ឺនដុល្លារ។ ពួកគេជ្រើសរើសស្នាក់នៅតាមបន្ទប់ខុនដូ ដើម្បីបង្កើតបរិយាកាសស្ងប់ស្ងាត់ ស្រដៀងនឹងបរិយាកាសការិយាល័យធនាគារ ឲ្យជនរងគ្រោះមានការជឿទុកចិត្ត។

បច្ចុប្បន្ន កម្លាំងជំនាញកំពុងបន្តកសាងសំណុំរឿង បញ្ជូនទៅអយ្យការអមសាលាដំបូង ដើម្បីចាត់ការតាមនីតិវិធីច្បាប់។ ជាមួយគ្នានេះ សមត្ថកិច្ចក៏អំពាវនាវដល់ប្រជាពលរដ្ឋឲ្យមានការប្រុងប្រយ័ត្នខ្ពស់ មិនបង្ហាញព័ត៌មានសម្ងាត់ ឬលេខ OTP ទៅឲ្យនរណាម្នាក់ ដើម្បីជៀសវាងការខាតបង់ទ្រព្យសម្បត្តិ៕