បុកកុងតឺន័រចតចោលគ្មានសញ្ញា! បុរសម្នាក់ជិះម៉ូតូល្បឿនលឿន រងរបួសធ្ងន់លើផ្លូវក្រវ៉ាត់ក្រុងទី៣

(ភ្នំពេញ)៖ គ្រោះថ្នាក់ចរាចរណ៍ដ៏គួរឲ្យភ្ញាក់ផ្អើលមួយបានកើតឡើង ដោយបុរសម្នាក់ជិះម៉ូតូល្បឿនលឿន បុកចូលរថយន្តកុងតឺន័រដែលចតចោលលើផ្លូវដោយមិនមានភ្លើងសញ្ញាព្រមាន បណ្ដាលឲ្យរងរបួសធ្ងន់ និងម៉ូតូខូចខាតទាំងស្រុង។ ហេតុការណ៍នេះបានកើតឡើងនៅវេលាម៉ោង១០៖៥១នាទីយប់ ថ្ងៃទី១០ ខែមេសា ឆ្នាំ២០២៦ នៅតាមបណ្ដោយផ្លូវក្រវ៉ាត់ក្រុងទី៣ ស្ថិតក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ បុរសរងគ្រោះបានជិះម៉ូតូមួយគ្រឿង ពាក់ស្លាកលេខ ភ្នំពេញ 1LQ-1498 ធ្វើដំណើរដោយល្បឿនលឿន។ ខណៈមកដល់ចំណុចខាងលើ បានបុកពេញទំហឹងទៅលើរថយន្តកុងតឺន័រមួយគ្រឿង ពាក់ស្លាកលេខ ភ្នំពេញ 4A-0600 ដែលចតចោលនៅលើផ្លូវដោយមិនមានដាក់ភ្លើងសញ្ញាព្រមាន ធ្វើឲ្យអ្នកបើកបរមិនអាចចៀសវាងបានទាន់ពេលវេលា។

បន្ទាប់ពីកើតហេតុ ប្រជាពលរដ្ឋនៅជិតទីតាំងបាននាំគ្នាជួយសង្គ្រោះ និងរាយការណ៍ទៅកាន់អាជ្ញាធរ។ រថយន្តសង្គ្រោះរបស់សង្កាត់គោករកា បានមកដល់ទីតាំងភ្លាមៗ ហើយដឹកយកជនរងគ្រោះទៅសង្គ្រោះបន្ទាន់នៅមន្ទីរពេទ្យសម្ដេចតេជោ។

ក្រោយពេលកើតហេតុ សមត្ថកិច្ចបានចុះមកធ្វើការវាស់វែង និងរៀបចំឯកសារពាក់ព័ន្ធ ដើម្បីបន្តនីតិវិធីតាមច្បាប់។ ជាមួយគ្នានេះ អាជ្ញាធរបានអំពាវនាវដល់ម្ចាស់យានយន្តទាំងអស់ ត្រូវគោរពវិធានសុវត្ថិភាព ជាពិសេសការចតយានយន្តលើដងផ្លូវ ត្រូវមានសញ្ញាព្រមានឲ្យបានត្រឹមត្រូវ ដើម្បីបង្ការហានិភ័យគ្រោះថ្នាក់ចរាចរណ៍៕