ស្នងការនគរបាលខេត្តកណ្តាលដឹកនាំពិធីសូត្រមន្តចម្រើនព្រះបរិត្ត សុំសេចក្តីសុខសាន្តមុនចូលឆ្នាំថ្មីប្រពៃណីជាតិខ្មែរ

(កណ្តាល)៖ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល និងលោកស្រី រ៉េត ផល្លីដា រួមជាមួយកងកម្លាំងនគរបាលក្រោមឱវាទ នៅរសៀលថ្ងៃព្រហស្បត្តិ៍ ៩រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៩ ខែមេសា ឆ្នាំ២០២៦ បានអញ្ជើញចូលរួមក្នុងពិធីសូត្រមន្តចម្រើនព្រះបរិត្ត នៅស្នងការដ្ឋាននគរបាលខេត្តកណ្តាល ដើម្បីអបអរសាទរ និងស្វាគមន៍បុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស.២០២៦។

ពិធីសូត្រមន្តនេះ ត្រូវបានរៀបចំឡើងតាមប្រពៃណីព្រះពុទ្ធសាសនា ដោយមានព្រះសង្ឃសូត្រមន្ត បួងសួងសុំសេចក្តីសុខ សេចក្តីចម្រើន និងសេចក្តីសុខសាន្ត ជូនដល់ថ្នាក់ដឹកនាំ កងកម្លាំងនគរបាល និងក្រុមគ្រួសារ ព្រមទាំងប្រជាពលរដ្ឋទូទៅ។ ពិធីនេះក៏បង្ហាញពីការរក្សាទុកនូវវប្បធម៌ប្រពៃណីដ៏ល្អប្រពៃ និងជំនឿសាសនា ដែលជាមូលដ្ឋាននៃភាពរឹងមាំសង្គមខ្មែរ។

ក្នុងឱកាសដ៏វិសេសវិសាលនេះ ថ្នាក់ដឹកនាំ និងកងកម្លាំងនគរបាល បានបួងសួងដល់គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិទាំងឡាយក្នុងលោក និងទេវតាឆ្នាំថ្មី ព្រះនាម រាក្យសាទេវី សូមប្រោះព្រំប្រសិទ្ធពរជ័យ សិរីមង្គល វិបុលសុខ បវរមហារប្រសើរ និងជួយតាមថែរក្សាបីបាច់ដល់ថ្នាក់ដឹកនាំខេត្ត កងកម្លាំងនគរបាល និងប្រជាពលរដ្ឋក្នុងខេត្តកណ្តាលទាំងមូល។

ជាមួយគ្នានេះ ក៏សូមឲ្យប្រជាពលរដ្ឋទាំងអស់ ជួបប្រទះនូវពុទ្ធពរទាំង ៤ ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ខណៈពេលដែលបុណ្យចូលឆ្នាំថ្មីប្រពៃណីជាតិខ្មែរ កាន់តែខិតជិតមកដល់៕