អភិបាលខេត្តកណ្ដាលកោតសរសើរ «ស្រុកល្វាឯម» ជាគំរូ កាត់បន្ថយទំនាស់ដីធ្លី ខណៈចែកប័ណ្ណជាង ៦ពាន់បណ្ណជូនពលរដ្ឋ

(កណ្ដាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានសម្តែងការកោតសរសើរដល់ប្រជាពលរដ្ឋស្រុកល្វាឯម ដែលមានបញ្ហាទំនាស់ដីធ្លីតិចតួចបំផុត បើប្រៀបធៀបនឹងក្រុង-ស្រុកទាំង១៣ ទូទាំងខេត្ត ដោយចាត់ទុកថា ជាគំរូល្អក្នុងការរស់នៅដោយសន្តិភាព និងគោរពច្បាប់។

ការលើកឡើងនេះ បានធ្វើឡើងក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន ០៦ភូមិ សរុប ៦,៣២១ បណ្ណ រួមមាន ភូមិជ្រោយជ្រែ ឃុំសំបួរ, ភូមិព្រែកប្រា, ភូមិព្រែជ្រៃ, ភូមិព្រែកឫស្សី, ភូមិអន្លង់ទ្រា និងភូមិពាមស្តី ឃុំព្រែឫស្សី ស្រុកល្វាឯម ខេត្តកណ្ដាល ក្រោមអធិបតីភាពឯកឧត្តម មាន ច័ន្ទវ៉ាន់នី អនុរដ្ឋលេខាធិការ ក្រសួងរៀបចំដែនដី នគររូបនីយកម្ម និងសំណង់ និងឯកឧត្តម នូ សាខន ប្រធានក្រុមប្រឹក្សាខេត្ត កាលពីព្រឹកថ្ងៃទី១០ ខែមេសា ឆ្នាំ២០២៦ នៅសាលាស្រុកល្វាឯម។

ឯកឧត្តមអភិបាលខេត្ត បានបញ្ជាក់ថា បញ្ហាទំនាស់ដីធ្លី គឺមាននៅគ្រប់ទីកន្លែង ប៉ុន្តែស្រុកល្វាឯម គឺជាគំរូដ៏ល្អមួយ ដែលអាចគ្រប់គ្រង និងកាត់បន្ថយជម្លោះបានយ៉ាងមានប្រសិទ្ធភាព។ ការចែកបណ្ណកម្មសិទ្ធិដីធ្លីជូនប្រជាពលរដ្ឋនៅពេលនេះ គឺជាចំណុចសំខាន់មួយ ក្នុងការធានាសិទ្ធិកាន់កាប់ស្របច្បាប់ កាត់បន្ថយវិវាទ និងបង្កើនសុវត្ថិភាពលើអចលនទ្រព្យរបស់ប្រជាពលរដ្ឋ។

ឯកឧត្តមបន្ថែមថា សមិទ្ធផលនេះ បង្ហាញពីការយកចិត្តទុកដាក់យ៉ាងខ្ពស់របស់រាជរដ្ឋាភិបាល ក្រោមការដឹកនាំរបស់ ហ៊ុន ម៉ាណែត នាយករដ្ឋមន្ត្រី ដែលបាន និងកំពុងអនុវត្តយ៉ាងសកម្មលើគោលនយោបាយដីធ្លី ដើម្បីធានាផលប្រយោជន៍ជាក់ស្តែងជូនប្រជាពលរដ្ឋ។

ជាមួយគ្នានេះ ឯកឧត្តមអភិបាលខេត្ត បានឲ្យដឹងថា ស្រុកល្វាឯម បានបិទបញ្ចប់ដំណើរការចុះបញ្ជីដីធ្លីមានលក្ខណៈជាប្រព័ន្ធ ហើយនៅសល់តែការផ្ដល់បណ្ណជូនប្រជាពលរដ្ឋប៉ុណ្ណោះ។ ដូច្នេះ ឯកសារផ្សេងៗក្រៅពីបណ្ណកម្មសិទ្ធិ មិនអាចយកទៅប្រើប្រាស់សម្រាប់លក់ ផ្ទេរកម្មសិទ្ធិ ឬបញ្ចាំបានឡើយ ហើយការធ្វើប្រតិបត្តិការណាមួយលើដីធ្លី ត្រូវអនុវត្តតាមនីតិវិធីច្បាប់ត្រឹមត្រូវ។

ឯកឧត្តម ក៏បានផ្ដាំផ្ញើដល់ប្រជាពលរដ្ឋឲ្យថែរក្សាបណ្ណកម្មសិទ្ធិដីធ្លីឲ្យបានល្អ ព្រោះវាជាឯកសារសំខាន់បញ្ជាក់សិទ្ធិកាន់កាប់ ធានាសុវត្ថិភាព និងជួយសម្រួលក្នុងការទិញលក់ ឬបញ្ចាំតាមច្បាប់។

ក្រៅពីនេះ ឯកឧត្តមអភិបាលខេត្ត ក៏បានអំពាវនាវដល់ប្រជាពលរដ្ឋ ឲ្យយកចិត្តទុកដាក់ថែទាំសុខភាពក្នុងរដូវក្ដៅ ដោយផឹកទឹកឱ្យគ្រប់គ្រាន់ ជៀសវាងនៅក្រោមកម្ដៅថ្ងៃយូរ ជាពិសេសកុមារ និងមនុស្សចាស់ ហើយត្រូវប្រុងប្រយ័ត្នខ្ពស់ចំពោះគ្រោះអគ្គីភ័យ ដោយកុំដុតសម្រាម ស្មៅ ឬព្រៃ ដែលអាចបង្កគ្រោះថ្នាក់ និងរាលដាលដល់លំនៅដ្ឋានរបស់ប្រជាពលរដ្ឋ៕