រដ្ឋមន្រ្តីក្រសួងព័ត៌មានដកហូតបណ្ណសារព័ត៌មានម្នាក់ ពាក់ព័ន្ធការប្រើឈ្មោះជាអ្នកកាសែតទារលុយ!

(ភ្នំពេញ)៖ រដ្ឋមន្រ្តីក្រសួងព័ត៌មាន នេត្រ ភក្ដ្រា បានសម្រេចលុបសុពលភាពបណ្ណសម្គាល់សារព័ត៌មាន ចំពោះបុគ្គលឈ្មោះ កៅ ពិសិដ្ឋ ហើយមិនអនុញ្ញាតឲ្យបន្តប្រកបអាជីពជាអ្នកសារព័ត៌មានតទៅទៀតនោះទេ បន្ទាប់ពីរកឃើញសកម្មភាពប្រើប្រាស់តួនាទីវិជ្ជាជីវៈខុសគោលការណ៍។

ការសម្រេចនេះ ត្រូវបានធ្វើឡើងក្រោយពេលបុគ្គលខាងលើ ត្រូវបានរាយការណ៍ថា បានយកឈ្មោះជាអ្នកសារព័ត៌មាន ទៅទារប្រាក់ពីម្ចាស់សិប្បកម្មផលិតទឹកកកមួយកន្លែង ស្ថិតនៅស្រុកបរិបូរណ៍ ខេត្តកំពង់ឆ្នាំង ដែលជាសកម្មភាពផ្ទុយពីក្រមសីលធម៌ និងវិជ្ជាជីវៈសារព័ត៌មានយ៉ាងធ្ងន់ធ្ងរ។

ជាមួយគ្នានេះ​ ឯកឧត្ដម នេត្រ ភក្ដ្រា ក៏បានបញ្ជាឲ្យអគ្គនាយកដ្ឋានព័ត៌មាន និងសោតទស្សន៍ ធ្វើការជូនដំណឹងទៅម្ចាស់អង្គភាពសារព័ត៌មានពាក់ព័ន្ធ ត្រូវពង្រឹងការគ្រប់គ្រងផ្ទៃក្នុង និងណែនាំដល់បុគ្គលិក និងអ្នកយកព័ត៌មានទាំងអស់ ឲ្យគោរពយ៉ាងតឹងរ៉ឹងនូវក្រមសីលធម៌ និងវិជ្ជាជីវៈ ក្នុងការបំពេញការងារ។

វិធានការដាច់ខាតនេះ ត្រូវបានចាត់ទុកថា ជាសារព្រមានដល់អ្នកប្រកបអាជីពសារព័ត៌មានទាំងអស់ ឲ្យគោរពតាមស្តង់ដារវិជ្ជាជីវៈ ដើម្បីថែរក្សាកិត្តិយស និងភាពជឿជាក់របស់វិស័យសារព័ត៌មាន នៅក្នុងសង្គម៕