រដ្ឋមន្រ្តីបរិស្ថានសម្តែងការដឹងគុណចំពោះអ្នកបានលះបង់សម្រាប់ជាតិ!

(ភ្នំពេញ)៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានសម្តែងនូវការគោរព និងដឹងគុណយ៉ាងជ្រាលជ្រៅ ចំពោះអតីតថ្នាក់ដឹកនាំ មន្រ្តីរាជការចូលនិវត្តន៍ ព្រមទាំងវីរយុទ្ធជនកម្ពុជា ដែលបានលះបង់កម្លាំងកាយចិត្ត ក្នុងការកសាងគ្រឹះសន្តិភាព ការពារជាតិ និងជំរុញការអភិវឌ្ឍប្រទេសជាតិឱ្យឈានទៅមុខ។

ការលើកឡើងនេះ ត្រូវបានធ្វើឡើងក្នុងឱកាសដែលឯកឧត្តមរដ្ឋមន្រ្តី អញ្ជើញជួបសំណេះសំណាល សួរសុខទុក្ខ និងនាំយកអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនដល់បងប្អូននិវត្តន៍ជនក្នុងគ្រួសារបរិស្ថានជាង១០០នាក់ នៅទីស្តីការក្រសួងបរិស្ថាន នារសៀលថ្ងៃទី៩ ខែមេសា ឆ្នាំ២០២៦។

ឯកឧត្តមបណ្ឌិត អ៊ាង សុផល្លែត បានគូសបញ្ជាក់ថា សមិទ្ធផលនានាដែលកម្ពុជាសម្រេចបានមកដល់បច្ចុប្បន្ន គឺជាផលវិបាកនៃការចូលរួមយ៉ាងសកម្មពីថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ ដែលបានរួមគ្នាអនុវត្តការងារគ្រប់វិស័យ ជាពិសេសវិស័យបរិស្ថាន ដូចជា ការគ្រប់គ្រងធនធានធម្មជាតិ ការអភិរក្សជីវៈចម្រុះ ការកាត់បន្ថយការបំពុល ការលើកកម្ពស់សេដ្ឋកិច្ចបៃតង និងការធានាចីរភាពបរិស្ថាន ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាល។

ជាមួយគ្នានេះ ឯកឧត្តមរដ្ឋមន្រ្តី ក៏បានបង្ហាញការដឹងគុណយ៉ាងជ្រាលជ្រៅចំពោះឥស្សរជនជាន់ខ្ពស់ និងវីរយុទ្ធជនកម្ពុជា រួមទាំងសម្ដេចតេជោ ហ៊ុន សែន ដែលបានដឹកនាំប្រទេសកម្ពុជា ឱ្យទទួលបានសន្តិភាព និងការអភិវឌ្ឍជាបន្តបន្ទាប់ រហូតមកដល់សម័យបច្ចុប្បន្ន។

ឯកឧត្តមបានបន្ថែមថា រាជរដ្ឋាភិបាលអាណត្តិទី៧ នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត បានដាក់ចេញ «យុទ្ធសាស្រ្តបញ្ចកោណ» ដំណាក់កាលទី១ ដើម្បីឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ខណៈក្រសួងបរិស្ថាន ក៏បានរៀបចំ «យុទ្ធសាស្រ្តចក្រាវិស័យបរិស្ថាន» ដោយផ្តោតលើសសរស្តម្ភសំខាន់ ៣ គឺ «ភាពស្អាត ភាពបៃតង និងចីរភាព»។

តាមរយៈយុទ្ធសាស្រ្តនេះ ក្រសួងបរិស្ថាន កំពុងជំរុញអនុវត្តសកម្មភាពជាក់ស្តែង ដើម្បីធានាឱ្យកម្ពុជាមានបរិស្ថានស្អាត ប្រជាពលរដ្ឋរស់នៅមានជីវភាពល្អប្រសើរ មានសុខភាពល្អ រក្សាគម្របព្រៃឈើឱ្យបានច្រើន និងឈានទៅសម្រេចគោលដៅអភិវឌ្ឍប្រកបដោយអព្យាក្រឹតកាបូន នៅឆ្នាំ២០៥០៕