តុលាការខេត្តព្រះវិហារ ចេញដីកាឃុំខ្លួនជនសង្ស័យ ៣នាក់ ពាក់ព័ន្ធករណីកាប់ព្រៃខុសច្បាប់ នៅដែនជម្រកសត្វព្រៃឆែប-ព្រះរការ

(ព្រះវិហារ)៖ តុលាការខេត្តព្រះវិហារ បានសម្រេចចេញដីកាបង្គាប់ឱ្យឃុំខ្លួនជនសង្ស័យចំនួន ៣នាក់ ដាក់ពន្ធនាគារបណ្តោះអាសន្ន ពាក់ព័ន្ធនឹងករណីលួចកាប់ព្រៃខុសច្បាប់ នៅក្នុងតំបន់ការពារធនធានធម្មជាតិ នៃដែនជម្រកសត្វព្រៃឆែប-ព្រះរការ។

ប្រតិបត្តិការបង្រ្កាបនេះ ត្រូវបានអនុវត្តដោយមន្ត្រីជំនាញនៃក្រសួងបរិស្ថាន សហការជាមួយមន្ត្រីឧទ្យានុរក្ស នៃមន្ទីរបរិស្ថានខេត្តព្រះវិហារ ក្រោមការចាត់តាំងផ្ទាល់ពីក្រសួងបរិស្ថាន ដោយបានចុះត្រួតពិនិត្យ ស្រាវជ្រាវ និងបង្ក្រាបបទល្មើសធនធានធម្មជាតិ នៅតំបន់អូរស្កាច (តំបន់៩៤) ស្ថិតក្នុងភូមិសាស្ត្រស្រុកជាំក្សាន្ត ខេត្តព្រះវិហារ កាលពីរសៀលថ្ងៃទី៩ ខែមេសា ឆ្នាំ២០២៦។

ជាលទ្ធផល កម្លាំងសមត្ថកិច្ចបានឃាត់ខ្លួនជនសង្ស័យចំនួន ៣នាក់ រួមមាន៖ នុត ជា, ខុន សាស និង សាន វី ដែលត្រូវបានសង្ស័យថា បានប្រព្រឹត្តសកម្មភាពកាប់ឈើដោយខុសច្បាប់។ បន្ទាប់ពីការឃាត់ខ្លួន សមត្ថកិច្ចបានកសាងសំណុំរឿង បញ្ជូនទៅសាលាដំបូងខេត្តព្រះវិហារ ដើម្បីចាត់វិធានការតាមនីតិវិធីច្បាប់។

ក្រោយពិនិត្យសំណុំរឿង តុលាការខេត្តព្រះវិហារ បានសម្រេចចេញដីកាបង្គាប់ឱ្យឃុំខ្លួនជនសង្ស័យទាំង ៣នាក់ ដាក់ពន្ធនាគារខេត្តព្រះវិហារ ជាបណ្តោះអាសន្ន ដើម្បីបន្តនីតិវិធីស៊ើបអង្កេត និងចាត់ការតាមច្បាប់។

គួរបញ្ជាក់ថា អាជ្ញាធរពាក់ព័ន្ធ និងក្រុមការងារជំនាញ កំពុងបន្តដាក់ចេញវិធានការតឹងរ៉ឹង ក្នុងការចុះស្រាវជ្រាវ ទប់ស្កាត់ និងបង្ក្រាបបទល្មើសពាក់ព័ន្ធធនធានធម្មជាតិ ដើម្បីធានាការពារ និងអភិរក្សធនធានធម្មជាតិឱ្យបានប្រសើរឡើងបន្ថែមទៀត៕