មានជនមិនស្គាល់អត្តសញ្ញាណមួយចំនួន កំពុងប្រើប្រាស់គណនី Telegram ក្លែងបន្លំ ដោយយកឈ្មោះ និងរូបភាពរបស់ ឯកឧត្តម សុខ ប្រសិទ្ធិ ដើម្បីឆបោក

(ភ្នំពេញ)៖ ក្រុមជំនួយការ​របស់ ឯកឧត្តម សុខ ប្រសិទ្ធិ រដ្ឋលេខាធិការក្រសួងព័ត៌មាន បានចេញសេចក្តីជូនដំណឹងបន្ទាន់មួយ ដើម្បីជូនដំណឹងដល់សាធារណជន ឱ្យបង្កើនការប្រុងប្រយ័ត្នខ្ពស់ ពាក់ព័ន្ធនឹងសកម្មភាពក្លែងបន្លំតាមបណ្តាញសង្គម។

តាមការបញ្ជាក់ មានជនមិនស្គាល់អត្តសញ្ញាណមួយចំនួន កំពុងប្រើប្រាស់គណនី Telegram ក្លែងបន្លំ ដោយយកឈ្មោះ និងរូបភាពរបស់ ឯកឧត្តម សុខ ប្រសិទ្ធិ ដើម្បីទាក់ទងទៅមិត្តភក្តិ បងប្អូន និងសាធារណជន ក្នុងគោលបំណងខ្ចីប្រាក់ ឬអនុវត្តសកម្មភាពផ្សេងៗ ដែលមិនមែនជាគណនីផ្លូវការរបស់ឯកឧត្តមឡើយ។

ក្រុមជំនួយការបានបញ្ជាក់យ៉ាងច្បាស់ថា សកម្មភាពទាំងនេះ មិនមានការពាក់ព័ន្ធជាមួយឯកឧត្តម សុខ ប្រសិទ្ធិទេ ហើយសូមអំពាវនាវឱ្យប្រជាពលរដ្ឋទាំងអស់ កុំជឿជាក់ ឬធ្វើការផ្ទេរប្រាក់ទៅគណនីណាមួយ ដែលប្រើប្រាស់ឈ្មោះ ឬរូបភាពរបស់ឯកឧត្តម ដោយគ្មានការផ្ទៀងផ្ទាត់ឱ្យបានច្បាស់លាស់ជាមុន។

ជាពិសេស សាធារណជនដែលទទួលបានសារ ឬជួបប្រទះសកម្មភាពគួរឱ្យសង្ស័យ សូមធ្វើការជូនដំណឹងភ្លាមៗ មកក្រុមជំនួយការផ្ទាល់ តាមលេខទូរស័ព្ទ៖
📞 095 956 590 / 098 235 192

ដើម្បីអាចប្រមូលព័ត៌មាន និងរាយការណ៍ទៅអាជ្ញាធរមានសមត្ថកិច្ច ចាត់វិធានការតាមនីតិវិធីច្បាប់។
អាស្រ័យដូចបានជម្រាបខាងលើ សូមសាធារណជនទាំងអស់ មេត្តាជ្រាបជាព័ត៌មាន និងចូលរួមការពារខ្លួនពីការបោកប្រាស់តាមបណ្តាញសង្គម៕