អាជ្ញាធរខេត្តកណ្តាលបន្តចុះរៀបចំសណ្តាប់ធ្នាប់ជុំវិញផ្សារគគីរ មហាជនសាទរ និងស្នើពង្រីកអនុវត្តទូទាំងខេត្ត

(កណ្តាល)៖ លោក ណុប ដារ៉ា អភិបាលរងខេត្តកណ្តាល នៅព្រឹកថ្ងៃទី០៧ ខែមេសា ឆ្នាំ២០២៦ បានដឹកនាំកម្លាំងជំនាញ និងអាជ្ញាធរពាក់ព័ន្ធ បន្តចុះត្រួតពិនិត្យ និងអនុវត្តវិធានការរៀបចំសណ្តាប់ធ្នាប់សាធារណៈ នៅតាមដងផ្លូវជុំវិញបរិវេណផ្សារគគីរ ស្ថិតតាមបណ្តោយផ្លូវជាតិលេខ១ ក្នុងភូមិសាស្ត្រស្រុកកៀនស្វាយ ខេត្តកណ្តាល ដើម្បីពង្រឹងរបៀបរៀបរយសាធារណៈ និងលើកកម្ពស់សោភ័ណភាពបរិស្ថានឱ្យកាន់តែប្រសើរឡើង។

ក្នុងឱកាសនោះ លោក ណុប ដារ៉ា បានលើកឡើងថា ការចុះអនុវត្តវិធានការនេះ មានគោលបំណងសំខាន់ ក្នុងការកាត់បន្ថយបញ្ហាកកស្ទះចរាចរណ៍ ដែលជាញឹកញាប់កើតមាននៅតំបន់ជុំវិញផ្សារ ដោយសារការចតយានយន្តមិនមានរបៀប និងការលក់ដូររំលោភលើចិញ្ចើមផ្លូវសាធារណៈ។ ជាមួយគ្នានេះ អាជ្ញាធរក៏បានជំរុញឱ្យមានការគ្រប់គ្រងសំណល់ឱ្យបានត្រឹមត្រូវ ដើម្បីជៀសវាងការបោះចោលសំរាមដោយគ្មានសណ្តាប់ធ្នាប់ ដែលប៉ះពាល់ដល់បរិស្ថាន និងសោភ័ណភាពទីផ្សារ។

ប្រជាពលរដ្ឋ និងអ្នកធ្វើដំណើរឆ្លងកាត់តំបន់ខាងលើ បានបង្ហាញការគាំទ្រយ៉ាងច្បាស់លាស់ចំពោះសកម្មភាពរបស់អាជ្ញាធរ ដោយចាត់ទុកថា វិធានការនេះមិនត្រឹមតែធ្វើឱ្យផ្លូវមានភាពទូលាយ និងងាយស្រួលធ្វើដំណើរប៉ុណ្ណោះទេ ប៉ុន្តែថែមទាំងជួយកាត់បន្ថយគ្រោះថ្នាក់ចរាចរណ៍ និងបង្កើនភាពងាយស្រួលក្នុងការទិញលក់ផងដែរ។

អភិបាលរងខេត្តបានបន្តថា អាជ្ញាធរបានណែនាំដល់អាជីវករដែលកំពុងលក់ដូរលើចិញ្ចើមផ្លូវ ឱ្យរុះរើតូប ឬការដាក់តាំងទំនិញដែលរំខានដល់ចរាចរណ៍ថ្មើរជើង និងយានយន្ត។ ជាពិសេស ស្លាកយីហោដែលលយចូលមកលើចំណីផ្លូវសាធារណៈ ត្រូវបានតម្រូវឱ្យរុះរើជាបន្ទាន់ ដោយគ្មានការលើកលែងឡើយ។

អាជ្ញាធរខេត្តក៏បានអំពាវនាវដល់បងប្អូនអាជីវករទាំងអស់ សូមបន្តសហការជាមួយអាជ្ញាធរ ដោយគោរពតាមវិធានការដែលបានដាក់ចេញ និងមិនត្រឡប់មកលក់ដូររំលោភលើចិញ្ចើមផ្លូវវិញ បន្ទាប់ពីសមត្ថកិច្ចចាកចេញ។ អាជ្ញាធរនឹងបន្តការតាមដាន និងចុះត្រួតពិនិត្យជាប្រចាំ ដើម្បីធានាឱ្យការអនុវត្តវិធានការនេះមានប្រសិទ្ធភាពយូរអង្វែង។

មហាជន និងអ្នកតាមដានសង្គម បានបង្ហាញការសាទរ និងគាំទ្រយ៉ាងខ្លាំងចំពោះការអនុវត្តវិធានការរបស់រដ្ឋបាលខេត្តកណ្តាល ដែលបានអនុវត្តយ៉ាងម៉ឺងម៉ាត់ និងមានប្រសិទ្ធភាពជាក់ស្តែង។

មតិសាធារណៈជាច្រើនបានលើកឡើងថា វិធានការនេះ គួរត្រូវបានពង្រីកអនុវត្តឲ្យបានទូលំទូលាយនៅគ្រប់បណ្ដារក្រុង ស្រុកទាំង១៣ ក្នុងខេត្ត ដើម្បីធានាបាននូវសណ្តាប់ធ្នាប់សាធារណៈ សោភ័ណភាពទីប្រជុំជន និងភាពស្មើភាពក្នុងការអនុវត្តច្បាប់។

មិនត្រឹមតែប៉ុណ្ណោះ មហាជនក៏បានស្នើសុំឱ្យអាជ្ញាធរពាក់ព័ន្ធ បន្តអនុវត្តវិធានការនេះឱ្យមានលក្ខណៈជាប្រព័ន្ធ និងមានតម្លាភាពខ្ពស់ ជៀសវាងការអនុវត្តជ្រើសរើសទីកន្លែង ឬរយៈពេលខ្លីប៉ុណ្ណោះ។ ការរឹតបន្តឹងបែបនេះ ត្រូវបានមើលឃើញថា ជាគន្លឹះសំខាន់ក្នុងការបង្កើនទំនុកចិត្តរបស់ប្រជាពលរដ្ឋលើអាជ្ញាធរ និងការគ្រប់គ្រងសាធារណៈ។

បន្ថែមពីនេះ អ្នកវិភាគសង្គមមួយចំនួនក៏បានលើកឡើងថា ប្រសិនបើការរៀបចំសណ្តាប់ធ្នាប់ត្រូវបានអនុវត្តជាបន្តបន្ទាប់ និងស្មើភាពគ្នានៅគ្រប់មូលដ្ឋាន នោះវានឹងជួយលើកកម្ពស់របៀបរស់នៅទីក្រុង បង្កើនសុវត្ថិភាពចរាចរណ៍ និងទាក់ទាញសកម្មភាពសេដ្ឋកិច្ចឱ្យកាន់តែរីកចម្រើនផងដែរ។

សកម្មភាពខាងលើ បានបង្ហាញឱ្យឃើញពីការយកចិត្តទុកដាក់ និងការប្តេជ្ញាចិត្តរបស់រដ្ឋបាលខេត្តកណ្តាល ក្នុងការកែលម្អបរិស្ថានរស់នៅ និងបង្កើនសណ្តាប់ធ្នាប់សាធារណៈឱ្យកាន់តែប្រសើរឡើងសម្រាប់ប្រជាពលរដ្ឋទូទៅ។

គួរបញ្ជាក់ថា នេះជាលើកទី៤ហើយ ដែលលោកអភិបាលរងខេត្ត បានដឹកនាំចុះរៀបចំសណ្តាប់ធ្នាប់សាធារណៈនៅជុំវិញតំបន់ផ្សារគគីរ ដោយបន្តអនុវត្តយ៉ាងម៉ឺងម៉ាត់ និងមានប្រសិទ្ធភាព៕