ឃាត់ខ្លួនជនបរទេស ២១៨នាក់ ក្នុងប្រតិបត្តិការដ៏ធំ បង្ក្រាបបណ្តាញឆបោកអនឡាញ នៅខុនដូភ្នំពេញកាឡាក់ស៊ីហ្គាដេន

(ភ្នំពេញ)៖ កម្លាំងសមត្ថកិច្ចរាជធានីភ្នំពេញ បានបើកប្រតិបត្តិការទ្រង់ទ្រាយធំ ឆ្មក់ចូលបង្ក្រាបទីតាំងសង្ស័យមួយកន្លែង ដែលលាក់បង្កប់សកម្មភាពឆបោកតាមប្រព័ន្ធបច្ចេកវិទ្យា ស្ថិតនៅខុនដូភ្នំពេញកាឡាក់ស៊ីហ្គាដេន ក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រតិបត្តិការនេះ បានធ្វើឡើងកាលពីថ្ងៃទី៦ ខែមេសា ឆ្នាំ២០២៦ ក្រោមការបញ្ជាដោយផ្ទាល់ពីឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយមានការចូលរួមពីអាជ្ញាធរខណ្ឌសែនសុខ និងសម្របសម្រួលនីតិវិធីច្បាប់ដោយលោក ជា សា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

ជាលទ្ធផល សមត្ថកិច្ចបានឃាត់ខ្លួនជនបរទេសសរុបចំនួន ២១៨នាក់ ក្នុងនោះមានស្ត្រី ១០នាក់ និងមានចម្រុះ៦សញ្ជាតិ រួមមាន៖ ជនជាតិចិន ៩៣នាក់ បង់ក្លាដេស ៩១នាក់ វៀតណាម ១៧នាក់ ឥណ្ឌា ១១នាក់ ជប៉ុន ៥នាក់ និងឡាវ ១នាក់។ គួរឲ្យកត់សម្គាល់ថា ក្នុងចំណោមនេះ មានមនុស្ស ១១៤នាក់ មិនមានលិខិតឆ្លងដែនជាប់ខ្លួនឡើយ។

នៅទីតាំងកើតហេតុ កម្លាំងជំនាញបានដកហូតវត្ថុតាងជាច្រើន រួមមានកុំព្យូទ័រ All-in-One ចំនួន ១៣៣គ្រឿង កុំព្យូទ័រយួរដៃ ៤៤គ្រឿង ទូរស័ព្ទដៃ ៣៩២គ្រឿង ម៉ូនីទ័រ ១៦គ្រឿង CPU ១៥គ្រឿង Tablet ៥គ្រឿង ព្រមទាំងសម្ភារៈពាក់ព័ន្ធនឹងការក្លែងបន្លំជានគរបាលជប៉ុន ដូចជា មួក អាវ និងកាតសម្គាល់ផងដែរ។

យោងតាមលទ្ធផលពិនិត្យបច្ចេកទេសលើឧបករណ៍អេឡិចត្រូនិច សមត្ថកិច្ចបានសន្និដ្ឋានថា ទីតាំងនេះពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា ក្នុងទម្រង់ផ្សេងៗ រួមមាន ការក្លែងបន្លំជានគរបាលប្រទេសជប៉ុន ដើម្បីឆបោកជនជាតិជប៉ុន ការលួងលោមស្នេហា និងការបោកប្រាស់តាមគម្រោងវិនិយោគ ដែលមានគោលដៅលើជនរងគ្រោះនៅប្រទេសចិន ឥណ្ឌា ប៉ាគីស្ថាន បង់ក្លាដេស និងវៀតណាម។

បច្ចុប្បន្ន ជនសង្ស័យទាំងអស់ រួមទាំងវត្ថុតាង ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីច្បាប់។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់យ៉ាងម៉ឺងម៉ាត់ថា កម្ពុជា មិនអនុញ្ញាតឲ្យក្លាយជាគោលដៅសម្រាប់ឧក្រិដ្ឋជនបច្ចេកវិទ្យា ឬសកម្មភាពឆបោកឆ្លងដែនឡើយ ហើយជនណាដែលពាក់ព័ន្ធ នឹងត្រូវទទួលទោសយ៉ាងតឹងរឹងតាមច្បាប់ ដោយគ្មានការយោគយល់។

គួរបញ្ជាក់ថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលមាន៥ជំពូក និង២៤មាត្រា ត្រូវបានប្រកាសដាក់ឲ្យប្រើប្រាស់ជាផ្លូវការ បន្ទាប់ពីការចុះហត្ថលេខាដោយសម្តេចតេជោ ហ៊ុន សែន ប្រមុខរដ្ឋស្តីទី កាលពីថ្ងៃទី៦ ខែមេសា ឆ្នាំ២០២៦។ ច្បាប់នេះបានកំណត់បទល្មើសព្រហ្មទណ្ឌថ្មីចំនួន៥ និងដាក់ទណ្ឌកម្មយ៉ាងតឹងរឹង រហូតដល់ជាប់ពន្ធនាគារជីវិត ពិន័យប្រាក់ដល់១ពាន់លានរៀល និងរឹបអូសទ្រព្យសម្បត្តិពាក់ព័ន្ធ៕