អគ្គនាយកដ្ឋានពន្ធនាគារ និងប្រៃសណីយ៍កម្ពុជា ចុះ MOU ពង្រឹងសេវាប្រៃសណីយ៍ ដើម្បីបង្កើនប្រសិទ្ធភាពការងារ

(ភ្នំពេញ)៖ នៅថ្ងៃទី០៧ ខែមេសា ឆ្នាំ២០២៦ អគ្គនាយកដ្ឋានពន្ធនាគារ នៃក្រសួងមហាផ្ទៃ និងប្រៃសណីយ៍កម្ពុជា បានចុះអនុស្សរណៈនៃការយោគយល់គ្នា (MOU) ស្ដីពីកិច្ចសហប្រតិបត្តិការ ក្នុងការផ្តល់សេវាប្រៃសណីយ៍ ដើម្បីលើកកម្ពស់ប្រសិទ្ធភាព និងភាពទាន់ពេលវេលានៃការបញ្ជូនឯកសារ។

ពិធីចុះហត្ថលេខានេះ បានប្រព្រឹត្តទៅក្រោមអធិបតីភាព ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ និងឯកឧត្តម ថេន សំវិសុទ្ធ អគ្គនាយកប្រៃសណីយ៍កម្ពុជា ដោយមានការចូលរួមពីថ្នាក់ដឹកនាំ អគ្គនាយករង ប្រធាននាយកដ្ឋាន និងមន្រ្តីជំនាញពាក់ព័ន្ធ នៅទីស្ដីការក្រសួងមហាផ្ទៃ។

ថ្លែងក្នុងឱកាសនោះ ឯកឧត្តម ឈន សាណាត បានបញ្ជាក់ថា អនុស្សរណៈនៃការយោគយល់គ្នានេះ ត្រូវបានរៀបចំឡើងក្នុងគោលបំណងកំណត់នីតិវិធីច្បាស់លាស់ សម្រាប់កិច្ចសហប្រតិបត្តិការ ក្នុងការផ្តល់សេវាប្រៃសណីយ៍ ជាពិសេសសេវាចែកបញ្ញើដល់គោលដៅចុងក្រោយ សម្រាប់បញ្ជូនលិខិតរដ្ឋបាល និងឯកសារគតិយុត្តផ្សេងៗពីអគ្គនាយកដ្ឋានពន្ធនាគារ ទៅកាន់គោលដៅត្រឹមត្រូវ និងទាន់ពេលវេលា។

កិច្ចសហការនេះ ត្រូវបានរំពឹងថា នឹងចូលរួមយ៉ាងសំខាន់ក្នុងការកែលម្អគុណភាពសេវាសាធារណៈ ស្របតាមគោលនយោបាយរបស់រាជរដ្ឋាភិបាលកម្ពុជា ក្នុងការបង្កើនប្រសិទ្ធភាពការងារ កាត់បន្ថយពេលវេលា និងសម្រាលបន្ទុកចំណាយរដ្ឋបាល។

ជាមួយគ្នានេះ ភាគីទាំងពីរ បានយល់ព្រមរួមគ្នាអនុវត្តយន្តការសហប្រតិបត្តិការដើម្បីធានាថា ការបញ្ជូនលិខិត និងឯកសារផ្សេងៗ ត្រូវបានអនុវត្តតាមស្តង់ដារបច្ចេកទេស និងមានភាពទុកចិត្តខ្ពស់ តាមរយៈសេវាបញ្ញើរបស់ប្រៃសណីយ៍កម្ពុជា៕