អគ្គិភ័យឆេះឃ្លាំងដេគ័រនៅសែនសុខ ខូចខាតទ្រព្យសម្បត្តិជាច្រើន មនុស្សរងរបួស ១នាក់

(ភ្នំពេញ)៖ នៅវេលាម៉ោង ១៨:១៣នាទី ល្ងាចថ្ងៃទី៦ ខែមេសា ឆ្នាំ២០២៦ មានករណីអគ្គិភ័យមួយបានឆាបឆេះឡើងនៅចំណុចឃ្លាំងដេគ័រ ស្ថិតនៅដីឡូតិ៍លេខ បេ០១ ផ្លូវបេតុង ១ឧសភា ភូមិច្រេស សង្កាត់គោកឃ្លាង ខណ្ឌសែនសុខ រាជធានីភ្នំពេញ។

តាមការបញ្ជាក់ពីសមត្ថកិច្ច ករណីអគ្គិភ័យនេះកំពុងស្ថិតក្នុងដំណាក់កាលស្រាវជ្រាវរកមូលហេតុ។ ហេតុការណ៍នេះបានបង្កឱ្យមានការខូចខាតទ្រព្យសម្បត្តិយ៉ាងច្រើន រួមមាន៖ ឃ្លាំងដេគ័រ សង់ពីថ្មប្រក់ស័ង្កសី ចំនួន ០១ខ្នង, ឃ្លាំងស្តុកសម្ភារគ្រឿងសំណង់ ចំនួន ០១ខ្នង, រថយន្តចំនួន ០៣គ្រឿង, ម៉ូតូចំនួន ០៥គ្រឿង និងរោងដែកប្រក់ស័ង្កសី ទំហំ ១០ម៉ែត្រ គុណ ១០ម៉ែត្រ ចំនួន ០១រោង (ខូចខាតប្រហែល ០៥%)។ ជាមួយគ្នានេះផងដែរ មានមនុស្សរងរបួសចំនួន ០១នាក់។

ដោយមានការចូលរួមអន្តរាគមន៍យ៉ាងសកម្មពីកម្លាំងជំនាញ អគ្គិភ័យនេះត្រូវបានគ្រប់គ្រង និងពន្លត់បានទាំងស្រុងនៅវេលាម៉ោង ២៣:៥៥នាទី នាថ្ងៃដដែល។ ក្នុងប្រតិបត្តិការនេះ ការិយាល័យអគ្គិភ័យរាជធានីភ្នំពេញបានប្រើប្រាស់រថយន្តចំនួន ២១គ្រឿង ដោយប្រើប្រាស់ទឹកសរុប ១៤៧ឡាន ស្មើនឹងប្រមាណ ៥៨៨ម៉ែត្រគូប។

បន្ថែមពីនេះ មានការគាំទ្រពីកម្លាំងជំនួយផ្សេងៗ រួមមាន៖
១. រថយន្តអគ្គិភ័យកងរាជអាវុធហត្ថ ចំនួន ០២គ្រឿង ប្រើប្រាស់ទឹក ០១ឡាន (ប្រមាណ ០៦ម៉ែត្រគូប)
២. រថយន្តអគ្គិភ័យបុរីប៉េងហួត ចំនួន ០២គ្រឿង ប្រើប្រាស់ទឹក ០៦ឡាន (ប្រមាណ ៣៦ម៉ែត្រគូប)
៣. រថយន្តអគ្គិភ័យស្រាបៀរកម្ពុជា ចំនួន ០១គ្រឿង ប្រើប្រាស់ទឹក ០៣ឡាន (ប្រមាណ ១៨ម៉ែត្រគូប)

សមត្ថកិច្ចកំពុងបន្តធ្វើការស្រាវជ្រាវដើម្បីកំណត់មូលហេតុពិតប្រាកដនៃអគ្គិភ័យនេះ ខណៈអាជ្ញាធរអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ក្នុងការប្រើប្រាស់ភ្លើង និងសម្ភារៈងាយឆេះ ដើម្បីបង្ការ ហានិភ័យអគ្គិភ័យនៅពេលអនាគត៕