រដ្ឋមន្ត្រីបរិស្ថានបញ្ជាចុះស៊ើបអង្កេត ករណីសង្ស័យមន្ត្រីទាមទារប្រាក់ពីក្រុមហ៊ុននៅកំពង់ស្ពឺ

(កំពង់ស្ពឺ)៖ តាមបញ្ជារបស់លោក អ៊ាង សុផល្លែត រដ្ឋមន្តក្រសួងបរិស្ថាន មន្ត្រីជំនាញក្រសួងបរិស្ថាន បានចុះស៊ើបអង្កេតស្វែងរកការពិត ពាក់ព័ន្ធករណីមន្ត្រីមន្ទីរបរិស្ថានខេត្តកំពង់ស្ពឺ ២រូប ដែលត្រូវបានសារព័ត៌មានផ្សាយថា សង្ស័យទាមទារប្រាក់ពីក្រុមហ៊ុនមួយ។

ការចុះពិនិត្យនេះធ្វើឡើងនៅរសៀលថ្ងៃទី៦ ខែមីនា ឆ្នាំ២០២៦ នៅរោងចក្រកែច្នៃដំណាប់ស្វាយ «ហុង ចេងហ្វាង» ស្ថិតក្នុងស្រុកភ្នំស្រួច ដោយមន្ត្រីជំនាញបានជួបសម្ភាសន៍តំណាងក្រុមហ៊ុន និងភាគីពាក់ព័ន្ធ ដើម្បីប្រមូលព័ត៌មានពាក់ព័ន្ធ និងបំភ្លឺការពិតឲ្យបានច្បាស់លាស់។

តាមប្រភពព័ត៌មាន ករណីនេះកើតឡើងបន្ទាប់ពីមានការផ្សព្វផ្សាយថា មន្ត្រីបរិស្ថានខេត្តបានទាមទារប្រាក់ចំនួន ១,៥០០ដុល្លារ ជាថ្នូរនឹងការវាយតម្លៃលើការគ្រប់គ្រងសំណល់របស់រោងចក្រ ប៉ុន្តែបន្ទាប់មកមានការព្រមព្រៀងគ្នាត្រឹម ៦០០ដុល្លារ។

ឯកឧត្ដមរដ្ឋមន្ត្រីបានបញ្ជាក់យ៉ាងច្បាស់ថា ក្រសួងបរិស្ថាននឹងមិនអនុញ្ញាតឲ្យមានអំពើខុសច្បាប់ ឬអំពើពុករលួយកើតមានឡើយ ហើយនឹងចាត់វិធានការយ៉ាងតឹងរឹងចំពោះមន្ត្រីដែលប្រព្រឹត្តខុស ខណៈដែលអ្នកមិនពាក់ព័ន្ធនឹងទទួលបានយុត្តិធម៌ពេញលេញ។

ករណីនេះកំពុងស្ថិតក្រោមការស៊ើបអង្កេត ដោយអាជ្ញាធរមានសមត្ថកិច្ច ដើម្បីធានាការអនុវត្តច្បាប់យ៉ាងត្រឹមត្រូវ តម្លាភាព និងរក្សាទុកទំនុកចិត្តសាធារណៈលើស្ថាប័នរដ្ឋ៕