សង្ក្រាន្តស្រុកមេសាង ប្រារព្ធយ៉ាងអធិកអធម ប្រជាពលរដ្ឋចូលរួមយ៉ាងកុះករ

(ព្រៃវែង)៖ កម្មវិធីព្រឹត្តិការណ៍សង្ក្រាន្តឆ្នាំថ្មីនៅស្រុកមេសាង ខេត្តព្រៃវែង នៅថ្ងៃចន្ទ ទី០៦ ខែមេសា ឆ្នាំ២០២៦នេះ ត្រូវបានប្រារព្ធឡើងយ៉ាងអធិកអធម និងមានបរិយាកាសសប្បាយរីករាយ ក្រោមអធិបតីភាពរបស់ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ និងជាអនុប្រធានទី១ ក្រុមការងាររាជរដ្ឋាភិបាលចុះមូលដ្ឋានស្រុកមេសាង ជាតំណាងដ៏ខ្ពង់ខ្ពស់របស់ ឯកឧត្តម ឆែម សាវុធ រដ្ឋលេខាធិការ ក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកមេសាង។

កម្មវិធីនេះបានប្រព្រឹត្តទៅនៅបរិវេណវិទ្យាល័យមេសាង ស្ថិតក្នុងឃុំជីផុច ស្រុកមេសាង ខេត្តព្រៃវែង ដោយមានការចូលរួមយ៉ាងច្រើនកុះករ ពីអាជ្ញាធរដែនដី មន្ត្រីរាជការ លោកគ្រូអ្នកគ្រូ សិស្សានុសិស្ស និងប្រជាពលរដ្ឋក្នុងតំបន់ បង្ហាញពីសាមគ្គីភាព និងការចូលរួមយ៉ាងសកម្មក្នុងការអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ។

ក្នុងឱកាសដ៏មានន័យនេះ ក៏មានការបួងសួងសុំសេចក្តីសុខ សុវត្ថិភាព និងការរីកចម្រើនជូនប្រជាពលរដ្ឋទូទាំងប្រទេស ព្រមទាំងការរៀបចំល្បែងប្រជាប្រិយខ្មែរ ដែលបង្កើតបរិយាកាសសប្បាយរីករាយ និងបន្សល់ទុកអនុស្សាវរីយ៍ល្អៗ សម្រាប់អ្នកចូលរួមទាំងអស់។

ព្រឹត្តិការណ៍សង្ក្រាន្តនេះ មិនត្រឹមតែជាការអបអរសាទរបុណ្យចូលឆ្នាំថ្មីប៉ុណ្ណោះទេ ប៉ុន្តែថែមទាំងជាឱកាសសំខាន់ក្នុងការរឹតបន្តឹងសាមគ្គីភាព ស្និទ្ធស្នាល និងការចូលរួមរវាងអាជ្ញាធរ និងប្រជាពលរដ្ឋ ក្នុងការអភិវឌ្ឍន៍សង្គមឲ្យកាន់តែរីកចម្រើនផងដែរ៕