ឧបនាយករដ្ឋមន្ត្រី ស៊ុន ចាន់ថុល ជំរុញប្រព័ន្ធឡូជីស្ទីកទំនើប បង្កើនសមត្ថភាពប្រកួតប្រជែងកម្ពុជា

(ភ្នំពេញ)៖ នាព្រឹកថ្ងៃទី៦ ខែមេសា ឆ្នាំ២០២៦ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ព្រមទាំងជាប្រធានក្រុមប្រឹក្សាជាតិភស្តុភារកម្មកម្ពុជា បានអញ្ជើញដឹកនាំកិច្ចប្រជុំក្រុមប្រឹក្សាជាតិភស្តុភារកម្មលើកទី១០ ដើម្បីពិនិត្យវឌ្ឍនភាពការងារ និងស្តាប់បទបង្ហាញស្តីពីការសិក្សាគម្រោងប៉ាណូឡិកាភស្តុភារកម្ម (Logistics Dashboard)។

កិច្ចប្រជុំនេះ មានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មាធិការជាតិភស្តុភារកម្ម រួមជាមួយតំណាងក្រសួង ស្ថាប័នពាក់ព័ន្ធ និងថ្នាក់ដឹកនាំវិស័យឯកជនជាច្រើន ដែលកំពុងដំណើរការនៅក្នុងវិស័យដឹកជញ្ជូន និងភស្តុភារកម្ម។

ក្នុងឱកាសថ្លែងបើកកិច្ចប្រជុំ លោកឧបនាយករដ្ឋមន្ត្រី ស៊ុន ចាន់ថុល បានគូសបញ្ជាក់ថា វិស័យភស្តុភារកម្ម (Logistics) មានតួនាទីស្នូលក្នុងការទាក់ទាញវិនិយោគ និងជំរុញសកម្មភាពសេដ្ឋកិច្ចជាតិ។ លោកបានបន្ថែមថា តម្លៃឡូជីស្ទីកដែលមានប្រសិទ្ធភាព និងប្រកួតប្រជែង គឺជាកត្តាសំខាន់ក្នុងការជំរុញភាពទាក់ទាញរបស់កម្ពុជា ទៅកាន់អ្នកវិនិយោគអន្តរជាតិ ដោយរាជរដ្ឋាភិបាលបានយកចិត្តទុកដាក់ខ្ពស់លើការកែលម្អវិស័យនេះជាបន្តបន្ទាប់។

លោកបានបន្តថា រាជរដ្ឋាភិបាលកម្ពុជា បានរៀបចំផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម ឆ្នាំ២០២៣-២០៣៣ ដែលកំណត់គម្រោងវិនិយោគសរុបប្រមាណ ១៧៤គម្រោង ជាមួយទុនវិនិយោគសរុបប្រមាណ ៣៦.៦ ពាន់លានដុល្លារអាមេរិក ដើម្បីពង្រឹង និងអភិវឌ្ឍប្រព័ន្ធឡូជីស្ទីកឱ្យកាន់តែទំនើប និងមានប្រសិទ្ធភាព។

ជាមួយគ្នានេះ លោកស្រី សន សុភាវត្តី អគ្គនាយកនៃអគ្គនាយកដ្ឋានភស្តុភារកម្ម បានបញ្ជាក់ថា គម្រោងប៉ាណូឡិកាភស្តុភារកម្ម (Logistics Dashboard) គឺជាឧបករណ៍សំខាន់សម្រាប់គាំទ្រការសម្រេចចិត្តយុទ្ធសាស្ត្ររបស់ថ្នាក់ដឹកនាំ តាមរយៈការផ្តល់ទិន្នន័យពិតប្រាកដ និងអាចវាស់វែងបាន ដើម្បីរៀបចំគោលនយោបាយ អភិវឌ្ឍ និងតាមដានលទ្ធផលប្រតិបត្តិការនានា។

លោកស្រីបានបន្ថែមថា ប៉ាណូឡិកានេះ នឹងផ្អែកលើសូចនាករចម្បង ៣កម្រិត រួមមាន៖ *កម្រិតយុទ្ធសាស្ត្រ សម្រាប់បង្ហាញទិសដៅ និងវឌ្ឍនភាពទូទៅ *កម្រិតប្រតិបត្តិការ ដែលបង្ហាញបញ្ហាប្រឈម និងស្ថានភាពជាក់ស្តែង (Real-time Data) និង*កម្រិតតាមដានលម្អិត សម្រាប់គ្រប់គ្រងប្រតិបត្តិការ និងដំណើរការផ្ទៃក្នុង

គួរបញ្ជាក់ថា នៅឆ្នាំ២០២៥ ធនាគារពិភពលោក បានផ្តល់ការគាំទ្រផ្នែកបច្ចេកទេសក្នុងការសិក្សា និងអភិវឌ្ឍប៉ាណូឡិកាភស្តុភារកម្មនេះ ដើម្បីធានាថា ទិន្នន័យដែលប្រើប្រាស់ មានភាពជាក់លាក់ ទាន់ពេលវេលា និងអាចជឿទុកចិត្តបាន សម្រាប់ការអភិវឌ្ឍវិស័យឡូជីស្ទីកនៅកម្ពុជាឱ្យឈានទៅមុខយ៉ាងមានប្រសិទ្ធភាព និងចីរភាព៕