បាញ់៣គ្រាប់ បំបែកកង់! សមត្ថកិច្ចបញ្ឈប់ Toyota Alphard បង្កហេតុ រត់គេចនៅចំការលើ

(កំពង់ចាម)៖ កម្លាំងសមត្ថកិច្ចបានប្រើវិធានការតឹងរ៉ឹង ដោយផ្ទុះអាវុធចំនួន ៣គ្រាប់ ដើម្បីបញ្ឈប់រថយន្តមួយគ្រឿង ដែលបង្កគ្រោះថ្នាក់ចរាចរណ៍បន្តបន្ទាប់ ហើយព្យាយាមរត់គេចពីកន្លែងកើតហេតុ និងការដេញតាមរបស់សមត្ថកិច្ច នៅព្រឹកថ្ងៃទី៦ ខែមេសា ឆ្នាំ២០២៦ ស្ថិតនៅភូមិអំពិលជួរ ឃុំតាអុង ស្រុកចំការលើ ខេត្តកំពង់ចាម។

យោងតាមការបញ្ជាក់ពីលោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បានឲ្យដឹងថា រថយន្តបង្កហេតុម៉ាក Toyota Alphard ពណ៌ខ្មៅ (បិទស្កុតលើកញ្ចក់) បានបើកបរក្នុងសភាពមិនប្រក្រតី និងបុករថយន្តចំនួន ២គ្រឿង នៅតាមដងផ្លូវក្នុងតំបន់ខាងលើ។

ក្រោយពេលកើតហេតុ កម្លាំងសមត្ថកិច្ចបានចេញអន្តរាគមន៍ភ្លាមៗ ដើម្បីបញ្ឈប់រថយន្ត ប៉ុន្តែអ្នកបើកបរមិនព្រមឈប់នោះទេ ហើយថែមទាំងបើកបរបុកប៉ះកម្លាំងនគរបាល បណ្ដាលឲ្យមានរបួសចំនួន ២នាក់ ព្រមទាំងបុកបំផ្លាញរថយន្តសមត្ថកិច្ច ១គ្រឿង និងម៉ូតូចំនួន ៣គ្រឿងបន្ថែមទៀត។

ក្នុងស្ថានភាពបន្ទាន់ ដើម្បីការពារសុវត្ថិភាពសាធារណៈ និងទប់ស្កាត់គ្រោះថ្នាក់បន្ថែម សមត្ថកិច្ចបានសម្រេចប្រើអាវុធ បាញ់ចំនួន ៣គ្រាប់ បំបែកកង់រថយន្ត បណ្ដាលឲ្យរថយន្តឈប់ចលនា និងអាចគ្រប់គ្រងស្ថានការណ៍បានដោយជោគជ័យ។

បច្ចុប្បន្ន សមត្ថកិច្ចបានឃាត់ខ្លួនជនសង្ស័យម្នាក់ ឈ្មោះ ប៉ុល ពោធិចា អាយុ ៣២ឆ្នាំ ជាជនជាតិខ្មែរ និងកំពុងធ្វើការសួរនាំបន្ថែមនៅអធិការដ្ឋាននគរបាលស្រុកចំការលើ ដើម្បីចាត់វិធានការតាមច្បាប់បន្ត៕