ឯកឧត្តម ហ៊ុន ម៉ានី ដឹកនាំកិច្ចប្រជុំសំខាន់ ពិភាក្សាសេចក្តីព្រាងណែនាំថ្មី ស្តីពីការរៀបចំមន្ត្រីរាជការ ក្នុងរចនាសម្ព័ន្ធអង្គភាពរដ្ឋឲ្យកាន់តែប្រសើរ

(ភ្នំពេញ)៖ នៅព្រឹកថ្ងៃទីនេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ (គ.វ.រ.) បានដឹកនាំកិច្ចប្រជុំលេខាធិការដ្ឋាន លើកទី១៣ ដើម្បីពិភាក្សាលើសេចក្តីព្រាងសេចក្តីណែនាំស្តីពី «ការតែងតាំងឡើងវិញមន្ត្រីរាជការ និងការរៀបចំមន្ត្រីក្នុងរចនាសម្ព័ន្ធថ្មី» របស់ទីស្តីការគណៈរដ្ឋមន្ត្រី ក្រសួង រដ្ឋលេខាធិការដ្ឋាន និងស្ថាប័នចំណុះអង្គការនីតិប្រតិបត្តិ។

កិច្ចប្រជុំដ៏មានសារៈសំខាន់នេះ ត្រូវបានរៀបចំនៅសាលប្រជុំ «តេជោសន្តិភាព» ដោយមានការចូលរួមពីសមាជិក សមាជិកា គ.វ.រ. ជាច្រើន រួមមានឯកឧត្តមឧបនាយករដ្ឋមន្ត្រី រដ្ឋមន្ត្រីប្រតិភូអមនាយករដ្ឋមន្ត្រី ថ្នាក់ដឹកនាំជាន់ខ្ពស់ តំណាងក្រសួង ស្ថាប័នពាក់ព័ន្ធ និងអភិបាលខេត្ត ព្រមទាំងមន្ត្រីជំនាញពាក់ព័ន្ធ។

សេចក្តីព្រាងសេចក្តីណែនាំនេះ ត្រូវបានរៀបចំឡើងក្នុងគោលបំណងធានាឲ្យមានការរៀបចំ និងតែងតាំងឡើងវិញមន្ត្រីរាជការស៊ីវិលឲ្យសមស្របតាមរចនាសម្ព័ន្ធថ្មី ដោយផ្អែកលើអភិក្រមសំខាន់ៗរបស់រាជរដ្ឋាភិបាល គឺ «រៀបចំផ្ទះឱ្យបានរៀបរយ» និង «ពង្រឹងជាជាងពង្រីក» ព្រមទាំងរក្សាបាននូវអត្ថប្រយោជន៍ជូនមន្ត្រីរាជការ។

ក្នុងឱកាសបើកកិច្ចប្រជុំ ឯកឧត្តម ហ៊ុន ម៉ានី បានគូសបញ្ជាក់ថា សេចក្តីព្រាងនេះបានឆ្លងកាត់ដំណើរការពិភាក្សាយ៉ាងម៉ត់ចត់ជាច្រើនលើក ទាំងកម្រិតបច្ចេកទេស និងអន្តរក្រសួង ដោយមានការចូលរួមយ៉ាងសកម្មពីក្រសួង ស្ថាប័នពាក់ព័ន្ធ និងការដ្ឋានកែទម្រង់ទាំង៥ របស់រាជរដ្ឋាភិបាល។

ជាមួយគ្នានេះផងដែរ ឯកឧត្តមក៏បានថ្លែងអំណរគុណដល់ថ្នាក់ដឹកនាំ និងមន្ត្រីពាក់ព័ន្ធទាំងអស់ ដែលបានចូលរួមសហការយ៉ាងសកម្មក្នុងការអនុវត្តការងារកន្លងមក ដោយរួមគ្នាប្រែក្លាយចក្ខុវិស័យរបស់ ហ៊ុន ម៉ាណែត ឱ្យក្លាយជាលទ្ធផលជាក់ស្តែង។

យោងតាមការណែនាំរបស់រាជរដ្ឋាភិបាល ការរៀបចំរចនាសម្ព័ន្ធថ្មី និងការតែងតាំងមន្ត្រីរាជការនេះ នឹងផ្អែកលើចំណុចសំខាន់ៗមួយចំនួន រួមមាន៖ *ការតែងតាំងឡើងវិញមន្ត្រីក្នុងមុខ*តំណែងគ្រប់គ្រង តាមរចនាសម្ព័ន្ធថ្មី*ការតែងតាំងមន្ត្រីស៊ីវិលឲ្យសមស្របនឹងតួនាទី*ការកំណត់នីតិវិធីអនុវត្ត និងយន្តការតាមដានត្រួតពិនិត្យ*ការសមាហរណកម្មមន្ត្រីទៅក្នុងរចនាសម្ព័ន្ធថ្មី*ការរៀបចំអង្គភាពក្រោមកម្រិតនាយកដ្ឋាននិងការកំណត់យន្តការជំរុញការអនុវត្តឲ្យមានប្រសិទ្ធភាពខ្ពស់។

កិច្ចប្រជុំលើកទី១៣នេះ ត្រូវបានគេមើលឃើញថា ជាជំហានសំខាន់មួយក្នុងការបន្តជំរុញដំណើរការកែទម្រង់រដ្ឋបាលសាធារណៈ ឲ្យកាន់តែមានប្រសិទ្ធភាព ប្រកបដោយតម្លាភាព និងឆាប់ឆាន់តាមបំណងអភិវឌ្ឍន៍របស់រាជរដ្ឋាភិបាលនីតិកាលទី៧៕