អំណោយទឹកបរិសុទ្ធ ២០០កេះ ពីក្រុមហ៊ុន GANZBERG ជូនអាវុធហត្ថកំពង់ស្ពឺ ស្វាគមន៍ឆ្នាំថ្មីប្រពៃណីជាតិខ្មែរ ខណៈឧត្តមសេនីយ៍ត្រី ម៉េង ស្រ៊ុន ផ្ញើសារថ្លែងអំណរគុណយ៉ាងជ្រាលជ្រៅជូនលោកស្រី អាន ម៉ូលីដា តំណាងក្រុមហ៊ុន

(កំពង់ស្ពឺ)៖ ក្នុងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ខាងមុខនេះ លោកស្រី អាន ម៉ូលីដា បានចាត់តាំងក្រុមការងារជាតំណាងឱ្យក្រុមហ៊ុន Genzeberg នាំយកទឹកបរិសុទ្ធ (GANZBERG) ចំនួន ២០០កេះ មកប្រគល់ជូនបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីចូលរួមគាំទ្រ និងលើកទឹកចិត្តដល់កងកម្លាំងក្នុងការបំពេញភារកិច្ចរក្សាសន្តិសុខ សណ្តាប់ធ្នាប់សាធារណៈក្នុងអំឡុងពេលបុណ្យជាតិដ៏សំខាន់នេះ។

ពិធីប្រគល់ទទួលនេះ បានប្រព្រឹត្តទៅនាថ្ងៃសៅរ៍ ២រោច ខែចេត្រ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៤ ខែមេសា ឆ្នាំ២០២៦ ក្រោមការចាត់ចែងរបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ដោយបានចាត់ឲ្យក្រុមការងាររៀបចំទទួលអំណោយនេះយ៉ាងកក់ក្ដៅ និងមានសេចក្តីសោមនស្សរីករាយ។

តាមរយៈក្រុមការងារអាវុធហត្ថ លោកឧត្តមសេនីយ៍ត្រី ម៉េង ស្រ៊ុន បានផ្ញើសារថ្លែងអំណរគុណយ៉ាងជ្រាលជ្រៅជូនចំពោះលោកស្រី អាន ម៉ូលីដា ជាតំណាងក្រុមហ៊ុន Genzeberg ប្រចាំខេត្តកំពង់ស្ពឺ ដែលតែងតែគាំទ្រ និងឧបត្ថម្ភដល់កងកម្លាំងអាវុធហត្ថទាំងក្នុងពេលបច្ចុប្បន្ន និងកន្លងមក។

ជាមួយគ្នានេះដែរ លោកឧត្តមសេនីយ៍ត្រី ក៏បានផ្តាំផ្ញើសារជូនពរ ដល់លោកស្រី អាន ម៉ូលីដា និងក្រុមគ្រួសារ ព្រមទាំងថ្នាក់ដឹកនាំ និងបុគ្គលិកក្រុមហ៊ុន Genzeberg ទាំងអស់ សូមឲ្យមានសុខភាពល្អ បរិបូរណ៍ សុភមង្គលក្នុងគ្រួសារ និងទទួលបានជោគជ័យគ្រប់ភារកិច្ច។ សូមឲ្យឆ្នាំថ្មីនេះ នាំមកនូវសំណាងល្អ និងភាពរីកចម្រើនជានិរន្តរ៍៕