អូរឈើទាលក្លាយជាគោលដៅទេសចរណ៍ស្តង់ដារអន្តរជាតិ! ព្រះសីហនុបើកឆាកមហាសង្ក្រាន្ត ២០២៦ ជាមួយ “ស្នាមញញឹម និងក្តីសង្ឃឹម”

(ព្រះសីហនុ)៖ នៅល្ងាចថ្ងៃទី៥ ខែមេសា ឆ្នាំ២០២៦ ឯកឧត្តម វង្ស ផាណាត ប្រធានក្រុមប្រឹក្សាខេត្ត និងលោកជំទាវ រួមជាមួយឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ និងលោកជំទាវ បានអញ្ជើញជាអធិបតីក្នុងពិធីសម្ពោធសមិទ្ធផលនានា នៅតំបន់ឆ្នេរអូរឈើទាល ព្រមទាំងបើកព្រឹត្តិការណ៍សម្តែងសិល្បៈវប្បធម៌ខ្មែរ និងល្បែងប្រជាប្រិយ សាទរមហាសង្ក្រាន្តឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស.២០២៦ ក្រោមប្រធានបទ៖ «ស្នាមញញឹម និងក្តីសង្ឃឹម នៃខេត្តព្រះសីហនុ»។

ក្នុងឱកាសដ៏មានអត្ថន័យនេះ ឯកឧត្តម ម៉ាង ស៊ីណេត អភិបាលខេត្ត បានមានប្រសាសន៍ថា ព្រឹត្តិការណ៍នេះរៀបចំឡើងស្របពេលដែលប្រជាពលរដ្ឋទូទាំងប្រទេសកំពុងត្រៀមទទួលអំណរបុណ្យចូលឆ្នាំថ្មី ប្រពៃណីជាតិខ្មែរ ដោយបង្ហាញពីសាមគ្គីភាព ក្តីស្រឡាញ់ជាតិ និងការរួមគ្នាអភិវឌ្ឍប្រទេសក្រោមបាវចនា «ជាតិ សាសនា ព្រះមហាក្សត្រ»។ ឯកឧត្តមបានលើកឡើងថា សាមគ្គីភាពជាថាមពលសំខាន់ដែលនាំឱ្យជាតិរឹងមាំ និងឈ្នះគ្រប់ឧបសគ្គ។

ព្រឹត្តិការណ៍នេះក៏មានគោលបំណងទាក់ទាញភ្ញៀវទេសចរជាតិ និងអន្តរជាតិ ឱ្យមកទស្សនាកម្សាន្តកាន់តែច្រើនក្នុងអំឡុងពេលបុណ្យចូលឆ្នាំថ្មី ព្រមទាំងលើកកម្ពស់ និងផ្សព្វផ្សាយអរិយធម៌ ប្រពៃណី និងទំនៀមទម្លាប់ដ៏ល្អរបស់ជាតិខ្មែរ ដែលបានបន្តមកតាំងពីបុរាណកាល។ បុណ្យចូលឆ្នាំថ្មីត្រូវបានប្រារព្ធឡើងរយៈពេល៣ថ្ងៃ រួមមាន «ថ្ងៃមហាសង្ក្រាន្ត» «ថ្ងៃវារៈវ័នបត» និង «ថ្ងៃឡើងស័ក» ដែលជាពេលវេលាដ៏សំខាន់សម្រាប់ការជួបជុំគ្រួសារ និងការអបអរសាទរឆ្នាំថ្មី។

ជាមួយគ្នានេះ ប្រជាពលរដ្ឋបានចូលរួមលេងល្បែងប្រជាប្រិយជាច្រើនដូចជា ចោលឈូង បោះអង្គុញ ទាញព្រ័ត្រ លាក់កន្សែង និងល្បែងបុរាណផ្សេងៗ ដែលមិនត្រឹមតែបង្កើនភាពសប្បាយរីករាយប៉ុណ្ណោះទេ ប៉ុន្តែថែមទាំងជួយលើកកម្ពស់សុខភាពរាងកាយ បញ្ញា និងការរួមរស់ជាសហគមន៍ផងដែរ។

ឯកឧត្តមអភិបាលខេត្តក៏បានបញ្ជាក់ថា សមិទ្ធផលដែលបានសម្ពោធក្នុងថ្ងៃនេះ គឺជាលទ្ធផលនៃការខិតខំរួមគ្នារវាងរដ្ឋបាលខេត្ត មន្ទីរ-អង្គភាពពាក់ព័ន្ធ និងអាជីវករ ក្នុងការកែលម្អតំបន់ឆ្នេរអូរឈើទាលឱ្យកាន់តែស្អាត និងទំនើប។ ក្នុងនោះរួមមានការរៀបចំចំណតយានយន្ត ការដាក់ប្រព័ន្ធភ្លើងបំភ្លឺសូឡា ការកែលម្អបរិស្ថានបៃតង ការសាងសង់ផ្លូវដើរ ការកែលម្អតូបអាហារ ការបំពាក់កាមេរ៉ាសុវត្ថិភាព និងការរៀបចំសំណង់សាធារណៈជាច្រើនទៀត ដែលបានបញ្ចប់ស្ទើរតែទាំងស្រុង។

សមិទ្ធផលទាំងនេះបានបំលែងឆ្នេរអូរឈើទាលឱ្យក្លាយជាគោលដៅទេសចរណ៍ស្អាត ទំនើប និងមានស្តង់ដារអន្តរជាតិ ស្របតាមយុទ្ធសាស្ត្រអភិវឌ្ឍខេត្តព្រះសីហនុ ឱ្យក្លាយជាគោលដៅទេសចរណ៍ឆ្នេរសមុទ្រឈានមុខមួយនៅតំបន់។

ឯកឧត្តមអភិបាលខេត្តបានអំពាវនាវដល់ប្រជាពលរដ្ឋ និងភាគីពាក់ព័ន្ធទាំងអស់ បន្តចូលរួមថែរក្សាសមិទ្ធផលទាំងនេះ ដោយយកចិត្តទុកដាក់លើអនាម័យ បរិស្ថាន និងសោភ័ណភាពឆ្នេរ ដើម្បីធានាបាននូវការអភិវឌ្ឍប្រកបដោយចីរភាព និងជួយលើកកម្ពស់សេដ្ឋកិច្ច និងជីវភាពរស់នៅរបស់ប្រជាពលរដ្ឋក្នុងខេត្តព្រះសីហនុ៕