មន្ទីររៀបចំដែនដីខេត្តកណ្តាលបំភ្លឺព័ត៌មានករណីវិវាទដីធ្លី “ធ្វើប្លង់រឹង ក្ដោបយកម៉ុងខ្មោច និងសាងសង់របងបិទមិនឱ្យចូលសែន” នៅស្រុកស្អាង
(កណ្តាល)៖ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកណ្តាល នៅថ្ងៃទី៤ ខែមេសា ឆ្នាំ២០២៦នេះ បានចេញសេចក្តីបំភ្លឺព័ត៌មានបន្ថែម ដើម្បីឆ្លើយតបនឹងការផ្សាយព័ត៌មានតាមបណ្តាញសារព័ត៌មាន និងបណ្តាញសង្គមមួយចំនួន ដែលបានលើកឡើងអំពីករណី “ធ្វើប្លង់រឹង ក្ដោបយកម៉ុងខ្មោច និងសាងសង់របងបិទមិនឱ្យចូលសែន” នៅភូមិត្រពាំងឈូក ឃុំព្រែកគយ ស្រុកស្អាង ខេត្តកណ្តាល។
តាមការស្រាវជ្រាវយ៉ាងលម្អិតរបស់មន្ទីរ និងអាជ្ញាធរមូលដ្ឋាន បានបញ្ជាក់ថា ដីដ៏មានវិវាទខាងលើ មានម្ចាស់ស្របច្បាប់ឈ្មោះ ហ៊ី ណារិន និងភរិយា ឈុន ជូ ដែលបានទិញតាមកិច្ចសន្យាលក់ផ្តាច់ពីឈ្មោះ ហូ សាឡាត់ តាំងពីថ្ងៃទី១៨ ខែមេសា ឆ្នាំ២០០៥ ដោយមានការទទួលស្គាល់ពីអាជ្ញាធរភូមិ និងឃុំ។
បន្ទាប់មក ម្ចាស់ដីបានចូលរួមក្នុងដំណើរការចុះបញ្ជីដីធ្លីមានលក្ខណៈជាប្រព័ន្ធ និងទទួលបានវិញ្ញាបនបត្រសម្គាល់ម្ចាស់អចលនវត្ថុ លេខ ០៨១០០៨០១-០៤៧១ មានទំហំ ១,៩៨៧ ម៉ែត្រការ៉េ នៅឆ្នាំ២០១២ ដែលមានសុពលភាពតាមច្បាប់។
យ៉ាងណាមិញ នៅលើដីនោះ មានម៉ុងមួយដែលត្រូវបានសាងសង់តាំងពីទស្សវត្សរ៍៦០ ហើយមានម្ចាស់ឈ្មោះ ឡា សុខវេង ដែលតែងតែចូលទៅសែនជាប្រចាំរៀងរាល់ឆ្នាំ។ ករណីវិវាទបានកើតឡើងក្រោយពេលម្ចាស់ដីថ្មីបានហាមឃាត់មិនឱ្យម្ចាស់ម៉ុងចូលប្រើប្រាស់ដីបន្ត និងកំពុងសាងសង់របងបិទជុំវិញបរិវេណ។
ក្នុងការដោះស្រាយបញ្ហានេះ អាជ្ញាធរឃុំព្រែកគយ និងរដ្ឋបាលស្រុកស្អាង បានអញ្ជើញភាគីទាំងពីរមកធ្វើការសម្រុះសម្រួលនៅថ្ងៃទី០៣ ខែមេសា ឆ្នាំ២០២៦ ប៉ុន្តែភាគីម្ចាស់ដីមិនបានចូលរួម។ ខណៈពេលដែលម្ចាស់ម៉ុង បានស្នើសុំឱ្យអាជ្ញាធរបន្តជួយអន្តរាគមន៍ដោះស្រាយវិវាទនេះ។
ជាបន្តទៀត នៅថ្ងៃទី០៤ ខែមេសា ឆ្នាំ២០២៦ អភិបាលស្រុកស្អាង បានបញ្ជាក់ថា អាជ្ញាធរនឹងចេញលិខិតអញ្ជើញភាគីទាំងពីរ មកចូលរួមសម្រុះសម្រួលជាថ្មី ដើម្បីដោះស្រាយបញ្ចប់វិវាទនេះ តាមនីតិវិធីច្បាប់ នៅថ្ងៃទី០៨ ខែមេសា ឆ្នាំ២០២៦ ខាងមុខ។
មន្ទីររៀបចំដែនដី ខេត្តកណ្តាល ក៏បានអំពាវនាវដល់សាធារណជន និងបណ្តាញផ្សព្វផ្សាយព័ត៌មានទាំងអស់ សូមពិនិត្យប្រភពព័ត៌មានឱ្យបានច្បាស់លាស់ មុននឹងធ្វើការចែកចាយ ដើម្បីជៀសវាងការបង្កការភាន់ច្រឡំ និងប៉ះពាល់ដល់ស្ថិរភាពសង្គម និងសិទ្ធិភាគីពាក់ព័ន្ធ។
ដោយឡែក បើតាមរាជរដ្ឋាភិបាលកម្ពុជាតែងតែយកចិត្តទុកដាក់ខ្ពស់ចំពោះបញ្ហាដីធ្លីដែលពាក់ព័ន្ធនឹងផ្នូរបុព្វបុរស ឬទីសក្ការៈបូជា ដែលជាប្រពៃណី វប្បធម៌ និងជំនឿដ៏ជ្រាលជ្រៅរបស់ប្រជាពលរដ្ឋខ្មែរ។
យោងតាមគោលនយោបាយ និងការអនុវត្តច្បាប់ពាក់ព័ន្ធ រាជរដ្ឋាភិបាលបានលើកទឹកចិត្តឱ្យមានការដោះស្រាយវិវាទដីធ្លីដោយសន្តិវិធី តាមរយៈការសម្រុះសម្រួល និងការយោគយល់គ្នារវាងភាគី ដោយគោរពទាំងសិទ្ធិកម្មសិទ្ធិឯកជនស្របច្បាប់ និងការអភិរក្សតម្លៃវប្បធម៌ប្រពៃណី ដូចជា ការគោរពទីតាំងផ្នូរដូនតា។
ជាក់ស្តែង ក្នុងករណីដីមានផ្នូរដូនតា ឬម៉ុងខ្មោច អាជ្ញាធរមូលដ្ឋានតែងតែអនុវត្តនីតិវិធីយ៉ាងប្រុងប្រយ័ត្ន ដោយលើកទឹកចិត្តឱ្យភាគីម្ចាស់ដី និងម្ចាស់ផ្នូរ ធ្វើការពិភាក្សាស្វែងរកដំណោះស្រាយសមរម្យ ដូចជា ការអនុញ្ញាតឱ្យចូលសែនតាមប្រពៃណី ឬការផ្លាស់ទីដោយមានការយល់ព្រម និងគោរពតាមច្បាប់ និងសុជីវធម៌សង្គម។
គោលនយោបាយនេះបង្ហាញពីការប្តេជ្ញារបស់រាជរដ្ឋាភិបាល ក្នុងការរក្សាសមតុល្យរវាង “សិទ្ធិច្បាប់” និង “តម្លៃវប្បធម៌” ដើម្បីធានាបាននូវសន្តិភាពសង្គម ការរួបរួមជាតិ និងការរស់នៅដោយសុខដុមរមនារបស់ប្រជាពលរដ្ឋ៕