មន្ទីរបរិស្ថានខេត្តមណ្ឌលគិរីពង្រឹងការអនុវត្តច្បាប់តឹងរឹង បង្ក្រាបបទល្មើសធនធានធម្មជាតិនៅដែនជម្រកសត្វកែវសីមា

(មណ្ឌលគិរី)៖ ដោយអនុវត្តយុទ្ធសាស្ត្រចក្រាវិស័យបរិស្ថាន និងគោលនយោបាយពង្រឹងការអនុវត្តច្បាប់ឱ្យមានប្រសិទ្ធភាព មន្ទីរបរិស្ថានខេត្តមណ្ឌលគិរី បានបន្តដឹកនាំកម្លាំងជំនាញ ចុះអនុវត្តយុទ្ធនាការបង្ក្រាបបទល្មើសធនធានធម្មជាតិយ៉ាងតឹងរឹង នៅថ្ងៃទី៣ ខែមេសា ឆ្នាំ២០២៦ នៅតំបន់ដែនជម្រកសត្វព្រៃកែវសីមា ដោយរកឃើញ និងចាត់វិធានការនៅ៣ទីតាំងផ្សេងគ្នា។

ក្នុងប្រតិបត្តិការខាងលើ កម្លាំងជំនាញបានចាប់ឃាត់ជនសង្ស័យចំនួន ១នាក់ ពាក់ព័ន្ធនឹងការដឹកជញ្ជូនឈើប្រភេទលេខ១ (ស្រឡៅ) ចំនួន ៩៣សន្លឹក តាមរយៈឡានកែឆ្នៃមួយគ្រឿង។ វត្ថុតាងទាំងនេះ ត្រូវបានដកហូត និងយកទៅរក្សាទុកនៅស្នាក់ការងបាយឆៅ ដើម្បីចាត់ចែងតាមនីតិវិធីច្បាប់។

ជាមួយគ្នានេះ ក្រុមការងារក៏បានដកហូតម៉ូតូកែឆ្នៃចំនួន ២គ្រឿង ដែលប្រើសម្រាប់ដឹកឈើប្រភេទលេខ១ (ស្រឡៅ) ចំនួន ៣កំណាត់ ស្មើនឹង ០.២៧០ ម៉ែត្រគូប ខណៈជនសង្ស័យបានរត់គេចខ្លួនបាត់។ វត្ថុតាងត្រូវបាននាំយកទៅរក្សាទុកនៅស្នាក់ការកណ្តាលកែវសីមា។

បន្ថែមពីនេះ កម្លាំងជំនាញបានចាប់ឃាត់ម៉ូតូចំនួន ១គ្រឿង ដែលដឹកសាច់ជ្រូកព្រៃចំនួន ៣០គីឡូក្រាម និងបានប្រទះឃើញឈើអារអញ្ញាតជនប្រភេទឈើទាល (ក្ដា) ចំនួន ៧០សន្លឹក ស្មើនឹង ១.៤០០ ម៉ែត្រគូប។ វត្ថុតាងទាំងនេះ ត្រូវបានយកទៅរក្សាទុកនៅស្នាក់ការរងរហ៊ូត ខណៈសាច់ជ្រូកព្រៃត្រូវបានដុតបំផ្លាញចោលតាមនីតិវិធី។

មន្ទីរបរិស្ថានខេត្តមណ្ឌលគិរី បានបញ្ជាក់ថា ករណីខាងលើ កំពុងត្រូវបានបន្តនីតិវិធីបញ្ជូនទៅតុលាការ ដើម្បីចាត់វិធានការតាមច្បាប់យ៉ាងតឹងរឹង។ ការអនុវត្តវិធានការយ៉ាងសកម្មនេះ គឺបង្ហាញពីការប្តេជ្ញាចិត្តរបស់អាជ្ញាធរ ក្នុងការការពារ និងថែរក្សាធនធានធម្មជាតិ ឱ្យមាននិរន្តរភាពសម្រាប់ជំនាន់ក្រោយ៕