ឯកឧត្តម គួច ចំរើន៖ ការផ្តល់ដី និងផ្ទះ ជាការតបស្នងសងគុណចំពោះវីរយុទ្ធជន!

(កណ្តាល)៖ ក្នុងស្មារតីយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់វីរយុទ្ធជនដែលបានលះបង់ដើម្បីបុព្វហេតុជាតិមាតុភូមិ សមាគមអតីតយុទ្ធជនកម្ពុជា បានរៀបចំពិធីចាប់ឆ្នោតផ្តល់ដីឡូតិ៍ និងផ្ទះជូនអតីតយុទ្ធជនខេត្តកណ្តាល ចំនួន ៥០គ្រួសារ ដើម្បីឱ្យបានរស់នៅលើទីតាំងដីសម្បទានសង្គមកិច្ចថ្មី ស្ថិតនៅភូមិអូរកាឌុប ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។ ពិធីនេះបានប្រារព្ធឡើងនារសៀលថ្ងៃទី៣ ខែមេសា ឆ្នាំ២០២៦ នៅសាលាខេត្តកណ្តាល។

ពិធីដ៏មានអត្ថន័យនេះ បានប្រព្រឹត្តទៅក្រោមអធិបតីភាពឯកឧត្តម ផារ៉ា មង្គល រដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់ និងឯកឧត្តម គួច ចំរើន អភិបាលនៃគណៈអភិបាលខេត្តកណ្តាល ដោយមានការចូលរួមពីមន្ត្រីពាក់ព័ន្ធ និងអតីតយុទ្ធជនយ៉ាងច្រើនកុះករ។

ដំណើរការចាប់ឆ្នោតត្រូវបានអនុវត្តយ៉ាងមានសណ្តាប់ធ្នាប់ បើកចំហ និងតម្លាភាពខ្ពស់ ដើម្បីធានាថាគ្រួសារអតីតយុទ្ធជនទាំងអស់ទទួលបានដី និងផ្ទះដោយស្មើភាព និងយុត្តិធម៌ពិតប្រាកដ។

ក្នុងឱកាសនោះ ឯកឧត្តម គួច ចំរើន បានបញ្ជាក់ថា ទោះបីមានតម្រូវការច្រើនលើស ១០០គ្រួសារ ក៏ដោយ តែតាមសមត្ថភាពបច្ចុប្បន្ន អាជ្ញាធរអាចដោះស្រាយជូនបានចំនួន ៥០គ្រួសារជាមុនសិន។ ឯកឧត្តមក៏បានលើកឡើងថា ការផ្តល់ដី និងផ្ទះនេះ សង្ឃឹមថានឹងជួយលើកកម្ពស់ជីវភាព និងជាការតបស្នងសងគុណចំពោះអតីតយុទ្ធជនដែលបានលះបង់ដ៏ថ្លៃថ្លា។

ឯកឧត្តមអភិបាលខេត្តបានបន្តថា ដីឡូតិ៍ដែលបានផ្តល់ជូន មានទំហំ ៧០ម៉ែត្រ គុណនឹង ១៥០ម៉ែត្រ ត្រូវបានកំណត់ព្រំដែនច្បាស់លាស់ និងមានលេខក្បាលដីត្រឹមត្រូវ។ លើសពីនេះ ក៏បានអំពាវនាវឲ្យបងប្អូនអតីតយុទ្ធជនខិតខំបង្កើនផល និងអភិវឌ្ឍជីវភាពរស់នៅឲ្យកាន់តែប្រសើរឡើង។

ជាមួយគ្នានេះដែរ ឯកឧត្តម ផារ៉ា មង្គល បានថ្លែងថា ការរៀបចំពិធីចាប់ឆ្នោតនេះ គឺដើម្បីធានាបាននូវយុត្តិធម៌ និងសិទ្ធិស្មើភាពសម្រាប់អតីតយុទ្ធជនទាំងអស់។ ការផ្តល់លំនៅឋាននេះ មិនត្រឹមជាការផ្តល់ទីជម្រកប៉ុណ្ណោះទេ ប៉ុន្តែជាការលើកតម្លៃ និងកិត្តិយសរបស់អតីតយុទ្ធជនដែលធ្លាប់បម្រើជាតិ។ ឯកឧត្តមក៏បានលើកទឹកចិត្តឲ្យអតីតយុទ្ធជនទាំងអស់ ត្រៀមខ្លួនទៅរស់នៅក្នុងទីតាំងថ្មី ដោយបង្កើតមុខរបរ និងថែរក្សាទ្រព្យសម្បត្តិដែលទទួលបានឲ្យបានយូរអង្វែង។

យោងតាមរបាយការណ៍របស់លោក នៃ និយម អនុប្រធានប្រចាំការ និងជាប្រធានលេខាធិការដ្ឋាន គណៈកម្មាធិការ អ.ន.ក ខេត្តកណ្តាល បានឲ្យដឹងថា កន្លងមក សមាគមអតីតយុទ្ធជន និងនិវត្តជនកម្ពុជា ខេត្តកណ្តាល បានផ្តល់ដី និងផ្ទះជូនអតីតយុទ្ធជនចំនួន ០៧គ្រួសារ នៅខេត្តផ្សេងៗ។ សម្រាប់ឆ្នាំ២០២៦នេះ បានបន្ថែមចំនួន ៥០គ្រួសារ ដែលកំពុងទទួលផលប្រយោជន៍តាមរយៈពិធីចាប់ឆ្នោតនេះ។

ពិធីនេះត្រូវបានចាត់ទុកថាជាការបង្ហាញពីគោលនយោបាយមនុស្សធម៌ និងការយកចិត្តទុកដាក់យ៉ាងជ្រាលជ្រៅរបស់រាជរដ្ឋាភិបាល ក្នុងការលើកកម្ពស់សុខុមាលភាព និងកិត្តិយសរបស់អតីតយុទ្ធជនកម្ពុជា៕