សន្តិសុខសាលារៀនម្នាក់ ត្រូវអប់រំ និងធ្វើកិច្ចសន្យា ក្រោយប្រព្រឹត្តសកម្មភាពអសីលធម៌លើផ្លូវសាធារណៈ

(ភ្នំពេញ)៖ បន្ទាប់ពីមានការផ្សព្វផ្សាយព័ត៌មានពាក់ព័ន្ធនឹងសកម្មភាពមិនសមរម្យមួយ កម្លាំងនគរបាលប៉ុស្តិ៍រដ្ឋបាលវាលវង់ នៃអធិការដ្ឋាននគរបាលខណ្ឌ៧មករា បានចាត់វិធានការស្រាវជ្រាវយ៉ាងយកចិត្តទុកដាក់ និងអញ្ជើញបុរសម្នាក់ ដែលមានមុខរបរជាសន្តិសុខយាមនៅសាលារៀនឯកជនមួយកន្លែង មកធ្វើការអប់រំ និងធ្វើកិច្ចសន្យា ដើម្បីបញ្ឈប់សកម្មភាពបែបនេះមិនឲ្យកើតឡើងម្ដងទៀត។

បុរសរូបនេះ ត្រូវបានសង្ស័យថា បានប្រព្រឹត្តសកម្មភាពអសីលធម៌ និងបំផ្លិចបំផ្លាញទ្រព្យសម្បត្តិរបស់អ្នកដទៃ នៅលើផ្លូវសាធារណៈ បណ្តាលឲ្យប៉ះពាល់ដល់សណ្ដាប់ធ្នាប់ និងសុវត្ថិភាពសង្គម។

ហេតុការណ៍នេះ បានកើតឡើងនៅវេលាម៉ោង៣:៣៥នាទីរសៀល ថ្ងៃទី២ ខែមេសា ឆ្នាំ២០២៦ លើផ្លូវលេខ២១៣ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

សមត្ថកិច្ចបានបញ្ជាក់ថា ការអនុវត្តវិធានការអប់រំ និងធ្វើកិច្ចសន្យានេះ គឺមានគោលបំណងបង្កើនការយល់ដឹងផ្នែកច្បាប់ និងទប់ស្កាត់ការប្រព្រឹត្តសកម្មភាពមិនសមរម្យក្នុងសង្គម ខណៈអាជ្ញាធរនឹងបន្តតាមដាន និងចាត់វិធានការតាមផ្លូវច្បាប់ ប្រសិនបើមានការលំបាកកើតឡើងម្ដងទៀត៕