ចែកប័ណ្ណដីជាង ៨ពាន់! អាជ្ញាធរខេត្តកណ្តាលព្រមានរឹតបន្តឹងសំណង់អត់ច្បាប់ និងបង្ក្រាបបទល្មើស

(កណ្តាល)៖ អាជ្ញាធរខេត្តកណ្តាលបានប្រគល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ ១២ភូមិ ក្នុងស្រុកស្អាង សរុប ៨,៨៤៤ ប័ណ្ណ នៅថ្ងៃទី២ ខែមេសា ឆ្នាំ២០២៦ ដើម្បីធានាសិទ្ធិកម្មសិទ្ធ និងពង្រឹងសុវត្ថិភាពរស់នៅ។

ឯកឧត្តម ហាក់ សុខមករា អភិបាលរងខេត្តបានព្រមានថា អាជ្ញាធរនឹងអនុវត្តវិធានការតឹងរ៉ឹងចំពោះសំណង់អត់ច្បាប់ ដោយតម្រូវឱ្យសុំច្បាប់មុនសាងសង់ ហើយសំណង់ល្មើសនឹងត្រូវផ្អាក ឬរុះរើ ដោយគ្មានការយោគយល់។

ជាមួយគ្នានេះ អាជ្ញាធរក៏អំពាវនាវឱ្យប្រជាពលរដ្ឋប្រុងប្រយ័ត្នចំពោះអំពើឆបោកអនឡាញ ការជួលផ្ទះឱ្យជនបរទេសដោយគ្មានការជូនដំណឹង និងបញ្ហាគ្រឿងញៀន-ល្បែងស៊ីសង ដែលកំពុងគំរាមកំហែងសន្តិសុខមូលដ្ឋាន។

អាជ្ញាធរបញ្ជាក់ថា ការអនុវត្តច្បាប់យ៉ាងតឹងរ៉ឹង និងការចូលរួមពីប្រជាពលរដ្ឋ គឺជាចំណុចសំខាន់ក្នុងការរក្សាសន្តិសុខ សណ្តាប់ធ្នាប់ និងអភិវឌ្ឍមូលដ្ឋានឱ្យមានចីរភាព៕