បញ្ជូនខ្លួនជនបង្កគ្រោះថ្នាក់ធ្ងន់ធ្ងរ ឈ្មោះ ស៊ីវ ជ័យសិដ្ឋ ទៅអយ្យការដើម្បីអនុវត្តច្បាប់ គ្មាននរណាអាចរួចផុតពីសំណាញ់ច្បាប់បានឡើយ

(បាត់ដំបង)៖ ស្នងការដ្ឋាននគរបាលខេត្តបាត់ដំបងបានបញ្ជាក់ថា ជនសង្ស័យឈ្មោះ ស៊ីវ ជ័យសិដ្ឋ ត្រូវបានបញ្ជូនខ្លួនទៅកាន់អយ្យការអមសាលាដំបូងខេត្តបាត់ដំបង ដើម្បីអនុវត្តតាមនីតិវិធីច្បាប់ បន្ទាប់ពីសមត្ថកិច្ចបានបញ្ចប់ការសាកសួរ និងរៀបចំសំណុំរឿងបានរួចរាល់។

តាមការបញ្ជាក់ពីអ្នកនាំពាក្យ នៅព្រឹកថ្ងៃទី០២ ខែមេសា ឆ្នាំ២០២៦ ជនសង្ស័យខាងលើ ដែលជាអ្នកបើកបររថយន្តបង្កគ្រោះថ្នាក់ចរាចរណ៍លើផ្លូវជាតិលេខ៥ ត្រង់ចំណុចក្រុមទី១២ ភូមិកកោះ ឃុំកកោះ ស្រុកមោងឫស្សី ខេត្តបាត់ដំបង បណ្តាលឱ្យមនុស្សស្លាប់ចំនួន៥នាក់ និងរងរបួស១នាក់ ត្រូវបាននាំខ្លួនបញ្ជូនទៅអយ្យការ បន្ទាប់ពីបានបញ្ចប់នីតិវិធីសាកសួរ និងកសាងសំណុំរឿងកាលពីថ្ងៃទី០១ ខែមេសា ឆ្នាំ២០២៦។

អាជ្ញាធរបានបញ្ជាក់ថា ការអនុវត្តច្បាប់យ៉ាងម៉ឺងម៉ាត់លើករណីនេះ បង្ហាញពីការប្តេជ្ញាចិត្តរបស់សមត្ថកិច្ចក្នុងការរក្សាយុត្តិធម៌ និងទប់ស្កាត់អំពើល្មើសក្នុងសង្គម ដោយគ្មានការលើកលែងចំពោះជនណាម្នាក់ឡើយ។

ករណីនេះក៏ជាសារព្រមានដល់អ្នកប្រើប្រាស់ផ្លូវទាំងអស់ឱ្យបង្កើនការប្រុងប្រយ័ត្ន និងគោរពច្បាប់ចរាចរណ៍យ៉ាងតឹងរឹង ព្រោះគ្រប់អំពើល្មើស នឹងត្រូវទទួលខុសត្រូវចំពោះមុខច្បាប់ដោយមិនអាចគេចផុតបានឡើយ៕