ផ្អាកពិធីជួបជុំអ្នកសារព័ត៌មានឆ្នាំ២០២៦ ខណៈក្រសួងព័ត៌មានរៀបចំពិធីគោរពវិញ្ញាណក្ខន្ធជំនួស

(ភ្នំពេញ)៖ ក្រសួងព័ត៌មានបានចេញសេចក្តីជូនដំណឹងជាផ្លូវការមួយ ដោយជម្រាបជូនដល់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី ម្ចាស់ប្រព័ន្ធផ្សព្វផ្សាយ អង្គការ សមាគម អ្នកសារព័ត៌មានជាតិ និងអន្តរជាតិ ព្រមទាំងអ្នកអនុវត្តសកម្មភាពក្នុងវិស័យព័ត៌មាន និងសោតទស្សន៍ទាំងអស់ឲ្យបានជ្រាបថា ពិធីជួបជុំរវាង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាមួយអ្នកសារព័ត៌មាន សម្រាប់ឆ្នាំ២០២៦ ត្រូវបានសម្រេចផ្អាក។

យ៉ាងណាមិញ ក្នុងនាមជាការរំលឹកដល់គុណូបការៈ និងវីរភាពដ៏អស្ចារ្យរបស់អ្នកសារព័ត៌មាន ដែលបានបាត់បង់ជីវិតក្នុងការបំពេញភារកិច្ចវិជ្ជាជីវៈអំឡុងពេលសង្គ្រាម ក្រសួងព័ត៌មានបានគ្រោងរៀបចំពិធីគោរពវិញ្ញាណក្ខន្ធ ដើម្បីសម្ដែងការគោរព និងអនុស្សាវរីយ៍ដ៏ថ្លៃថ្នូរ។

ពិធីនេះនឹងប្រព្រឹត្តទៅនៅព្រឹកថ្ងៃទី៣ ខែឧសភា ឆ្នាំ២០២៦ ខាងមុខនេះ នៅស្តូបអនុស្សាវរីយ៍អ្នកសារព័ត៌មាន ដែលស្ថិតនៅខាងមុខស្ថានទូតបារាំង។

តាមរយៈសេចក្តីជូនដំណឹងនេះ ក្រសួងព័ត៌មានក៏សូមអញ្ជើញ និងជូនដំណឹងដល់ភាគីពាក់ព័ន្ធទាំងអស់ឲ្យបានជ្រាប និងចូលរួមតាមការគួរ ដើម្បីរួមចំណែកក្នុងការគោរព និងរំលឹកដល់អ្នកសារព័ត៌មានដែលបានលះបង់ជីវិត ដើម្បីបម្រើសង្គម និងសេរីភាពព័ត៌មាន៕