កម្ពុជា លើកកម្ពស់ “សុខភាពតែមួយ” ដើម្បីពង្រឹងសន្តិសុខសុខភាពជាតិ និងអន្តរជាតិ

(ភ្នំពេញ)៖ នាព្រឹកថ្ងៃពុធ ទី១ ខែមេសា ឆ្នាំ២០២៦ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល រួមជាមួយ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ព្រមទាំង ឯកឧត្តម Olivier Richard ឯកអគ្គរដ្ឋទូតសាធារណរដ្ឋបារាំងប្រចាំកម្ពុជា បានអញ្ជើញជាសហអធិបតីក្នុងពិធីបើកព្រឹត្តិការណ៍ “សុខភាពតែមួយនៅកម្ពុជា (One Health for Cambodia)” ដែលរៀបចំឡើងនៅសណ្ឋាគារសូហ្វីតែល ភ្នំពេញ ភូគីត្រា។

ព្រឹត្តិការណ៍នេះ ជាផ្នែកមួយនៃការចូលរួមគាំទ្រកិច្ចប្រជុំកំពូលស្តីពីសុខភាពតែមួយ (One Health Summit) ដែលនឹងប្រារព្ធធ្វើនៅទីក្រុងលីយ៉ុង នៃសាធារណរដ្ឋបារាំង ចាប់ពីថ្ងៃទី៥ ដល់ថ្ងៃទី៧ ខែមេសា ឆ្នាំ២០២៦ ខាងមុខនេះ។ កម្ពុជាបានបង្ហាញពីការប្តេជ្ញាចិត្តយ៉ាងមុតមាំ ក្នុងការជំរុញអនុវត្តក្របខណ្ឌ “សុខភាពតែមួយ” ដើម្បីពង្រឹងសមត្ថភាពការពារ ការស្រាវជ្រាវ និងការឆ្លើយតបចំពោះហានិភ័យសុខភាពដែលពាក់ព័ន្ធជាមួយមនុស្ស សត្វ និងបរិស្ថាន។

តាមរយៈកិច្ចសហការជិតស្និទ្ធរវាងក្រសួងសុខាភិបាល ក្រសួងកសិកម្ម និងក្រសួងបរិស្ថាន កម្ពុជាបានអនុវត្តយុទ្ធសាស្ត្រជាតិ ដើម្បីប្រយុទ្ធប្រឆាំងនឹងបញ្ហាភាពស៊ាំនឹងឱសថប្រឆាំងមេរោគ (AMR) ដោយផ្តោតលើការពង្រឹងសមត្ថភាពមន្ទីរពិសោធន៍ ការត្រួតពិនិត្យ និងគ្រប់គ្រងការប្រើប្រាស់ឱសថប្រកបដោយការទទួលខុសត្រូវ នៅទាំងវិស័យសុខាភិបាល និងកសិកម្ម។

ជាពិសេស ការការពារ និងត្រួតពិនិត្យជំងឺឆ្លងពីសត្វទៅមនុស្ស (Zoonotic diseases) ត្រូវបានដាក់ជាអាទិភាពខ្ពស់ ក្នុងនោះមានជំងឺសំខាន់ៗដូចជា ជំងឺផ្តាសាយបក្សី ជំងឺ Nipah ជំងឺកូវីដ-១៩ ជំងឺរលាកស្រោមខួរក្បាល Japanese Encephalitis និងជំងឺឆ្កែឆ្កួត ដែលកំពុងត្រូវបានតាមដានយ៉ាងតឹងរឹង តាមរយៈយន្តការអន្តរក្រសួង (IMCC-OH)។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តី បានផ្តល់អនុសាសន៍សំខាន់ៗ ដើម្បីជំរុញការអភិវឌ្ឍន៍ក្របខណ្ឌសុខភាពតែមួយ ឲ្យមានប្រសិទ្ធភាព និងនិរន្តភាព រួមមាន៖ ការពង្រឹងសម្របសម្រួលពហុវិស័យ ការកែលម្អប្រព័ន្ធអង្កេតតាមដាន និងប្រកាសអាសន្ន ការពង្រីកកម្មវិធីសិក្សាស្រាវជ្រាវ និងបណ្តុះបណ្តាល ការធានានិរន្តភាពហិរញ្ញវត្ថុ និងការពង្រឹងកិច្ចសហការថ្នាក់តំបន់ និងអន្តរជាតិ។

ជាចុងក្រោយ ឯកឧត្តមសាស្រ្តាចារ្យរដ្ឋមន្រ្តី បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំ មន្រ្តីរាជការ និងដៃគូអភិវឌ្ឍន៍ទាំងអស់ ដែលបានចូលរួមយ៉ាងសកម្មក្នុងការអនុវត្តក្របខណ្ឌសុខភាពតែមួយ ដោយបង្ហាញពីស្មារតីសាមគ្គីភាព និងការទទួលខុសត្រូវខ្ពស់ ក្នុងការពារសុខភាពសាធារណៈ និងសន្តិសុខសុខភាពជាតិ៕