ក្រសួងទេសចរណ៍បង្ហាញយុទ្ធសាស្ត្រថ្មី ឆ្នាំ២០២៦ ដើម្បីពង្រឹងការប្រកួតប្រជែង និងទាក់ទាញភ្ញៀវទេសចរអន្តរជាតិ

(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ រួមជាមួយលោក នេត ភក្ត្រា រដ្ឋមន្ត្រីក្រសួងព័ត៌មាន បានអញ្ជើញជាអធិបតីក្នុងពិធីផ្សព្វផ្សាយក្រោមប្រធានបទ «ស្ថានភាពទេសចរណ៍កម្ពុជា នៅក្នុងបរិបទតំបន់ និងពិភពលោកដែលមានភាពមិនប្រាកដប្រជា និងប្រែប្រួលឆាប់រហ័ស» ដើម្បីបង្ហាញពីទិសដៅអភិវឌ្ឍវិស័យទេសចរណ៍ និងយុទ្ធសាស្ត្រសំខាន់ៗសម្រាប់ឆ្នាំ២០២៦។

ពិធីនេះបានប្រារព្ធឡើងនៅថ្ងៃទី៣១ ខែមីនា ឆ្នាំ២០២៦ ដោយមានការចូលរួមពីថ្នាក់ដឹកនាំ និងមន្ត្រីរាជការនៃក្រសួងទេសចរណ៍ និងក្រសួងព័ត៌មាន ព្រមទាំងអ្នកសារព័ត៌មាន និង Influencers ប្រមាណ៣៥០នាក់ បង្ហាញពីការចូលរួមយ៉ាងសកម្មក្នុងការផ្សព្វផ្សាយ និងលើកកម្ពស់រូបភាពវិស័យទេសចរណ៍កម្ពុជា។

ក្នុងឱកាសនោះ លោក ហួត ហាក់ បានគូសបញ្ជាក់អំពីសារៈសំខាន់នៃការវិវឌ្ឍវិស័យទេសចរណ៍កម្ពុជា ក្នុងបរិបទពិភពលោកដែលកំពុងប្រឈមនឹងភាពមិនច្បាស់លាស់ និងការប្រែប្រួលឆាប់រហ័ស ដោយបានលើកឡើងពីលទ្ធផលជោគជ័យនៃការរៀបចំព្រឹត្តិការណ៍ «បុណ្យទន្លេលើកទី១០» ក៏ដូចជាការខិតខំប្រឹងប្រែងក្នុងការរក្សាកំណើន និងភាពធន់នៃវិស័យទេសចរណ៍ជាតិ។

ជាមួយគ្នានេះ ក្រសួងទេសចរណ៍បានដាក់ចេញយុទ្ធនាការសំខាន់ៗចំនួន៤ សម្រាប់ឆ្នាំ២០២៦ រួមមាន៖

យុទ្ធនាការទស្សនាកម្ពុជា នៅរដូវកាលបៃតង (Green Season) ចាប់ពីខែឧសភា ដល់ខែតុលា ដើម្បីលើកទឹកចិត្តភ្ញៀវទេសចរទស្សនាកម្ពុជា ក្នុងរដូវកាលមានធម្មជាតិស្រស់បំព្រង
គម្រោងសាកល្បងលើកលែងទិដ្ឋាការសម្រាប់ពលរដ្ឋចិន រយៈពេល៤ខែ ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ដើម្បីជំរុញចំនួនភ្ញៀវទេសចរចិន
យុទ្ធនាការរដូវកាលសាមគ្គីភាព (Solidarity Season) ក្នុងគោលបំណងបង្កើនការចូលរួម និងការគាំទ្រពីគ្រប់ភាគីពាក់ព័ន្ធ
ការពង្រឹងកិច្ចសហប្រតិបត្តិការជាមួយប្រព័ន្ធផ្សព្វផ្សាយ ទាំងក្នុង និងក្រៅប្រទេស ដើម្បីផ្សព្វផ្សាយសក្តានុពលទេសចរណ៍កម្ពុជា ឱ្យកាន់តែទូលំទូលាយ និងមានប្រសិទ្ធភាពខ្ពស់

លោករដ្ឋមន្ត្រីបានបញ្ជាក់ថា ការអនុវត្តយុទ្ធនាការទាំងនេះ គឺមានគោលដៅបង្កើនទំនុកចិត្តរបស់ភ្ញៀវទេសចរជាតិ និងអន្តរជាតិ និងបន្តលើកស្ទួយកេរ្តិ៍ឈ្មោះកម្ពុជា ជាគោលដៅទេសចរណ៍ «សុវត្ថិភាព កក់ក្តៅ ស្អាត និងបៃតង» ដែលមានសមត្ថភាពប្រកួតប្រជែងខ្ពស់នៅក្នុងតំបន់ និងលើឆាកអន្តរជាតិ។

ជាមួយនេះផងដែរ លោក ហួត ហាក់ បានថ្លែងអំណរគុណចំពោះក្រសួងព័ត៌មាន ស្ថាប័នផ្សព្វផ្សាយទាំងអស់ អ្នកសារព័ត៌មាន និងអ្នកបង្កើតមាតិកាឌីជីថល (Influencers) ដែលបានចូលរួមយ៉ាងសកម្មក្នុងការផ្សព្វផ្សាយព័ត៌មានវិជ្ជមាន បង្ហាញពីសក្តានុពលទេសចរណ៍ និងការពិតអំពីកម្ពុជា ព្រមទាំងរួមចំណែកប្រយុទ្ធប្រឆាំងព័ត៌មានក្លែងក្លាយ ដែលអាចប៉ះពាល់ដល់រូបភាពប្រទេស។

ពិធីផ្សព្វផ្សាយនេះ ត្រូវបានចាត់ទុកថាជាវេទិកាសំខាន់មួយ សម្រាប់ការចែករំលែកព័ត៌មាន ការប្តូរយោបល់ និងការសហការរវាងអាជ្ញាធរ និងវិស័យផ្សព្វផ្សាយ ក្នុងគោលបំណងរួមគ្នាលើកស្ទួយវិស័យទេសចរណ៍កម្ពុជា ឱ្យបន្តរីកចម្រើន និងមានភាពរឹងមាំបន្ថែមទៀត ក្នុងឆ្នាំ២០២៦ និងអនាគត៕