លោកអធិការក្រុងតាខ្មៅ យី វណ្ណដា ប្តេជ្ញាពង្រឹងសន្តិសុខ សណ្តាប់ធ្នាប់ និងទប់ស្កាត់បទល្មើសគ្រប់ប្រភេទ

(កណ្ដាល)៖ ដោយបានការអនុញ្ញាតពី លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល នៅរសៀលថ្ងៃទី៣១ ខែមីនា ឆ្នាំ២០២៦ លោកវរសេនីយ៍ឯក យី វណ្ណដា អធិការនៃអធិការដ្ឋាននគរបាលក្រុងតាខ្មៅ បានដឹកនាំកិច្ចប្រជុំបូកសរុបសភាពការណ៍ប្រចាំខែមីនា និងដាក់ចេញទិសដៅការងារសម្រាប់ខែមេសា ឆ្នាំ២០២៦ ដោយមានការចូលរួមពីមន្ត្រីពាក់ព័ន្ធយ៉ាងទូលំទូលាយ។

ក្នុងកិច្ចប្រជុំនេះ បានផ្តោតសំខាន់លើការពិនិត្យ វាយតម្លៃ និងពង្រឹងប្រសិទ្ធភាពការងារសន្តិសុខ សណ្តាប់ធ្នាប់សាធារណៈ ក្នុងមូលដ្ឋាន ដោយលើកយកប្រធានបទសំខាន់ៗមួយចំនួនមកពិភាក្សា និងណែនាំអនុវត្តរួមមាន៖ *ការពង្រឹងវិន័យ និងសុចរិតភាពរបស់កងកម្លាំងនគរបាល ដើម្បីធានាបាននូវភាពជាម៉ូឌែល និងជឿជាក់ពីសាធារណជន។*ការផ្សព្វផ្សាយ និងត្រៀមអនុវត្តផែនការការពារសន្តិសុខ សុវត្ថិភាព និងសណ្តាប់ធ្នាប់ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ នាពេលខាងមុខ។*ការចុះរៀបចំសណ្តាប់ធ្នាប់សាធារណៈ និងសម្រួលចរាចរណ៍នៅតាមគោលដៅកកស្ទះ ដើម្បីបង្កើនភាពរលូន និងកាត់បន្ថយគ្រោះថ្នាក់។*ការអនុវត្តយ៉ាងម៉ឺងម៉ាត់នូវគោលនយោបាយ “ភូមិ-សង្កាត់មានសុវត្ថិភាព” ទាំង៧ចំណុច របស់រាជរដ្ឋាភិបាល។*ការងារអត្តសញ្ញាណកម្ម ដើម្បីគ្រប់គ្រងទិន្នន័យប្រជាពលរដ្ឋឲ្យបានត្រឹមត្រូវ និងទាន់សម័យ។*ការទប់ស្កាត់ និងបង្រ្កាបបាតុភូតក្មេងទំនើង ដែលជាបញ្ហាសង្គមកំពុងត្រូវការការយកចិត្តទុកដាក់ខ្ពស់។

លោកអធិការបានណែនាំឲ្យគ្រប់ផ្នែកជំនាញ និងប៉ុស្តិ៍នគរបាល ត្រូវបន្តសហការយ៉ាងជិតស្និទ្ធ អនុវត្តតួនាទីភារកិច្ចដោយមានការទទួលខុសត្រូវខ្ពស់ ប្រកាន់ខ្ជាប់នូវវិជ្ជាជីវៈ និងគោលការណ៍ច្បាប់ ដើម្បីធានាបាននូវសន្តិសុខ សុវត្ថិភាព និងសេចក្តីសុខសាន្តជូនប្រជាពលរដ្ឋ។

គួរបញ្ជាក់ថា កិច្ចប្រជុំនេះមានការចូលរួមពីលោក លោកស្រី អធិការរង លោកនាយផ្នែកជំនាញទាំង៩ និងលោកនាយប៉ុស្តិ៍ទាំង១០ ដែលបានចូលរួមផ្តល់មតិយោបល់ និងចូលរួមពង្រឹងផែនការអនុវត្តឲ្យកាន់តែមានប្រសិទ្ធភាពខ្ពស់៕