ពិនិត្យបញ្ជីទណ្ឌិតជាង ១,២០០នាក់ ស្នើសុំបន្ធូរបន្ថយ និងលើកលែងទោស ក្នុងឱកាសបុណ្យជាតិឆ្នាំ២០២៦

(ភ្នំពេញ)៖ នារសៀលថ្ងៃអង្គារ ទី៣១ ខែមីនា ឆ្នាំ២០២៦ នេះ កើត រិទ្ធ ឯកឧត្ដមឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស បានអញ្ជើញដឹកនាំកិច្ចប្រជុំសំខាន់មួយ ដើម្បីពិនិត្យ និងវាយតម្លៃលើសំណើសុំបន្ធូរបន្ថយទោស និងលើកលែងទោសរបស់ទណ្ឌិត ក្នុងឱកាសពិធីបុណ្យចូលឆ្នាំថ្មីប្រពៃណីជាតិ និងពិធីបុណ្យវិសាខបូជា ឆ្នាំ២០២៦ ខាងមុខ។

កិច្ចប្រជុំនេះមានការចូលរួមពីសំណាក់ឯកឧត្តម លោកជំទាវ លោក លោកស្រី ដែលជាអនុប្រធាន និងសមាជិកនៃគណៈកម្មការថ្នាក់ជាតិ តំណាងអយ្យការទទួលបន្ទុកមណ្ឌលអប់រំកែប្រែទាំង៤ ប្រធានមណ្ឌលអប់រំកែប្រែទាំង៤ ព្រមទាំងមន្ត្រីជំនាញមួយចំនួនពីក្រសួងយុត្តិធម៌ និងក្រសួងមហាផ្ទៃ។

យោងតាមលទ្ធផលនៃកិច្ចប្រជុំ គណៈកម្មការថ្នាក់ជាតិបានពិនិត្យ និងវាយតម្លៃលើបញ្ជីឈ្មោះទណ្ឌិតស្នើសុំសរុបចំនួន ១,២៥៤ នាក់ ក្នុងនោះមានស្ត្រីចំនួន ១០៥ នាក់។ ចែកចេញជា៖

*១. សម្រាប់ពិធីបុណ្យចូលឆ្នាំថ្មីប្រពៃណីជាតិ មានចំនួន ៦៦៨ នាក់ (ស្រី ៥៣ នាក់) ។ *២. សម្រាប់ពិធីបុណ្យវិសាខបូជា មានចំនួន ៥៨៦ នាក់ (ស្រី ៥២ នាក់)

សំណើសុំទាំងនេះត្រូវបានបញ្ជូនមកពីពន្ធនាគាររាជធានី-ខេត្តចំនួន ២៤ និងមណ្ឌលអប់រំកែប្រែចំនួន ៤ ដែលបានធ្វើការត្រួតពិនិត្យជាមុនតាមនីតិវិធីច្បាប់។

ដំណើរការពិនិត្យ និងវាយតម្លៃត្រូវបានអនុវត្តដោយយកចិត្តទុកដាក់ខ្ពស់ ដោយផ្អែកលើគោលការណ៍មនុស្សធម៌ ការកែប្រែអត្តចរិត និងភាពរួចរាល់ក្នុងការរួមបញ្ចូលខ្លួនវិញទៅសង្គម។ វាជាផ្នែកមួយនៃគោលនយោបាយរបស់រាជរដ្ឋាភិបាល ក្នុងការលើកកម្ពស់ឱកាសថ្មីដល់ទណ្ឌិតដែលបានកែប្រែខ្លួនល្អ និងគោរពតាមវិន័យក្នុងមណ្ឌលឃុំឃាំង។

កិច្ចប្រជុំនេះបង្ហាញពីការបន្តអនុវត្តយ៉ាងតឹងរឹងនៃនីតិវិធីច្បាប់ ព្រមទាំងការយកចិត្តទុកដាក់លើមុខងារមនុស្សធម៌ ក្នុងការផ្តល់ឱកាសឱ្យទណ្ឌិតបានវិលត្រឡប់ទៅរស់នៅក្នុងសង្គមវិញ ដោយមានការត្រួតពិនិត្យ និងវាយតម្លៃយ៉ាងម៉ត់ចត់ និងតម្លាភាព៕