ពង្រឹងអភិបាលកិច្ច និងតម្លាភាព! កាកបាទក្រហមកម្ពុជាដាក់ចេញទិសដៅការងារថ្មី បន្តបេសកកម្មមនុស្សធម៌

(ភ្នំពេញ)៖ នៅរសៀលថ្ងៃទី៣១ ខែមីនា ឆ្នាំ២០២៦ ក្នុងឱកាសបិទកិច្ចប្រជុំមួយដ៏សំខាន់ លោកជំទាវបណ្ឌិត ពេជ ច័ន្ទមុន្នី ហ៊ុនម៉ាំណែត បានថ្លែងប្រសាសន៍បើកបង្ហាញលទ្ធផល និងទិសដៅការងារបន្ត ដោយពាំនាំនូវព្រះរាជសុវណ្ណីផ្តាំផ្ញើសួរសុខទុក្ខ និងការកោតសរសើរយ៉ាងជ្រាលជ្រៅពីសម្តេចព្រះមហាក្សត្រី ព្រះវរាជមាតាជាតិខ្មែរ នរោត្តម មុនិនាថ សីហនុ និងជាព្រះប្រធានកិត្តិយសកាកបាទក្រហមកម្ពុជា។

ជាមួយគ្នានេះដែរ ក៏មានប្រសាសន៍ផ្តាំផ្ញើសួរសុខទុក្ខ និងការលើកទឹកចិត្តពីសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះឯកឧត្តម លោកជំទាវ លោកឧកញ៉ា និងសប្បុរសជនទាំងអស់ ដែលបានស្ម័គ្រចិត្តចូលរួមគាំទ្របេសកកម្មមនុស្សធម៌របស់កាកបាទក្រហមកម្ពុជាយ៉ាងសកម្មកន្លងមក។

ក្នុងឱកាសនោះ លោកជំទាវបណ្ឌិត ក៏បានថ្លែងអំណរគុណយ៉ាងជ្រាលជ្រៅដល់ Dorsa Nazami-Salman ប្រធានបេសកកម្មនៃ គណៈកម្មាធិការកាកបាទក្រហមអន្តរជាតិ ដែលតែងតែផ្តល់កិច្ចសហប្រតិបត្តិការយ៉ាងជិតស្និទ្ធ ការគាំទ្រប្រកបដោយមិត្តភាព និងការចែករំលែកបទពិសោធន៍ ដើម្បីជួយជំរុញប្រសិទ្ធភាពការងាររបស់កាកបាទក្រហមកម្ពុជា។

ជាលទ្ធផលនៃកិច្ចប្រជុំ អង្គប្រជុំបានឯកភាពលើទិសដៅការងារសំខាន់ៗ សម្រាប់អនុវត្តបន្តនៅកម្រិតសាខា និងក្រុមប្រតិបត្តិ ដោយផ្តោតលើចំណុចស្នូលចំនួន៦ រួមមាន៖
ទី១៖ ពង្រឹងអភិបាលកិច្ចល្អ ដោយកំណត់តួនាទី និងភារកិច្ចឱ្យបានច្បាស់លាស់
ទី២៖ លើកកម្ពស់តម្លាភាព និងគណនេយ្យភាព ជាគន្លងសំខាន់សម្រាប់ការជឿទុកចិត្ត
ទី៣៖ បន្តរៀនសូត្រ និងកែលម្អសមត្ថភាពជានិច្ច
ទី៤៖ យកចិត្តទុកដាក់លើសុវត្ថិភាពការងារ
ទី៥៖ គោរព និងអនុលោមតាមច្បាប់មនុស្សធម៌អន្តរជាតិ
និងទី៦៖ ជំរុញការចូលរួមយ៉ាងសកម្មក្នុងទិវា ៨ ឧសភា ដែលជាចលនាមនុស្សធម៌ដ៏សកម្ម និងផុលផុស៕