បញ្ហាគ្រឿងស្រវឹងកើនឡើង កំពុងគំរាមកំហែងដល់អនាគតសង្គម

(ភ្នំពេញ)៖ នៅក្នុងសារដែលបង្ហាញពីការព្រួយបារម្ភយ៉ាងជ្រាលជ្រៅរបស់ឯកឧត្ដម​ ផៃ ប៊ុនឈឿន រដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងដោយស្មោះត្រង់ថា ទោះបីជាមន្ត្រីនៅក្នុងប្រព័ន្ធក៏ដោយ ក៏មានអារម្មណ៍ថា មិនអាចនៅស្ងៀមចំពោះបញ្ហាសង្គមដែលកំពុងកើនឡើងជាបន្តបន្ទាប់បានទេ។

ឯកឧត្ដមបានបញ្ជាក់ថា ការបញ្ចេញមតិនេះ មិនមែនមានគោលបំណងប៉ះពាល់ដល់បុគ្គល ឬអង្គភាពណាមួយឡើយ ប៉ុន្តែជាការចែករំលែកមតិយោបល់ និងការព្រមាន ដើម្បីឲ្យសង្គមទាំងមូលយកចិត្តទុកដាក់ និងពិចារណាអំពីបញ្ហាដែលកំពុងកើតមានជាក់ស្តែង។

តាមការសង្កេតឃើញក្នុងរយៈពេលចុងក្រោយ បញ្ហាជាច្រើនមាននិន្នាការកើនឡើងគួរឲ្យព្រួយបារម្ភ ជាពិសេសពាក់ព័ន្ធនឹងការប្រើប្រាស់គ្រឿងស្រវឹង រួមមាន៖ *គ្រោះថ្នាក់ចរាចរណ៍បណ្តាលមកពីការបើកបរបន្ទាប់ពីសេពគ្រឿងស្រវឹង កើនឡើងជាបន្តបន្ទាប់។ *ករណីស្លាប់ជាក្រុម ឬគ្រួសារ ពាក់ព័ន្ធនឹងហេតុការណ៍ដូចខាងលើ ក៏មាននិន្នាការកើនឡើង។*ជនបង្កមួយចំនួនគេចផុតពីការទទួលខុសត្រូវ ឬទទួលបាននិទណ្ឌភាព
ការដោះស្រាយមិនទាន់មានភាពស្មើភាព ទាំងផ្លូវច្បាប់ និងមនុស្សធម៌។*ការផ្សព្វផ្សាយពាណិជ្ជកម្មគ្រឿងស្រវឹង តាមទូរទស្សន៍ និងបណ្តាញសង្គម កើនឡើងគួរឲ្យកត់សម្គាល់។*ចំនួនអ្នកប្រើប្រាស់គ្រឿងស្រវឹងកើនឡើង ជាពិសេសក្នុងស្រទាប់យុវវ័យ។*ព្រឹត្តិការណ៍កម្សាន្ត និងការប្រគំតន្ត្រីជាច្រើន ភ្ជាប់ជាមួយការរៀបតុលក់ និងផឹកគ្រឿងស្រវឹង ក្លាយជាទម្រង់ពេញនិយម
ស្រទាប់យុវវ័យមួយចំនួនបាត់បង់គុណធម៌ និងសីលធម៌ បណ្ដាលឲ្យមានអំពើហិង្សា និងប៉ះពាល់ដល់សន្តិសុខសង្គម។

ឯកឧត្ដមបានបន្ថែមថា ប្រសិនបើបញ្ហាទាំងនេះនៅតែបន្តដោយគ្មានវិធានការទប់ស្កាត់ប្រកបដោយប្រសិទ្ធភាព នោះវាអាចនាំឲ្យសង្គមប្រឈមមុខនឹងវិបត្តិធ្ងន់ធ្ងរ ទាំងផ្នែកសុវត្ថិភាពសាធារណៈ សុខភាពប្រជាជន និងអនាគតយុវជនជាតិ។

ក្នុងន័យនេះ ត្រូវបានគេមើលឃើញថា ជាការជំរុញឲ្យអាជ្ញាធរ អង្គភាពពាក់ព័ន្ធ និងសង្គមទាំងមូល ចូលរួមយ៉ាងសកម្មក្នុងការពង្រឹងវិធានការគ្រប់គ្រង កាត់បន្ថយហានិភ័យ និងលើកកម្ពស់ការយល់ដឹង ដើម្បីរក្សាសុវត្ថិភាព និងស្ថិរភាពសង្គមក្នុងរយៈពេលវែង៕