សង្ស័យករណីចាក់ថ្នាំបណ្តាលស្លាប់ភ្លាមៗ! គ្រួសារជនរងគ្រោះទាមទារយុត្តិធម៌ពីគ្លីនិកឯកជនមួយនៅខេត្តតាកែវ

(តាកែវ)៖ មានករណីដ៏គួរឲ្យភ្ញាក់ផ្អើលមួយ បានកើតឡើងនៅគ្លីនិកឯកជនមួយ ដែលមានឈ្មោះថា «បន្ទប់ថែទាំជំងឺទូទៅលោកគ្រូពេទ្យ ប៊ុណ្ណា» បន្ទាប់ពីបុរសម្នាក់ត្រូវបានរាយការណ៍ថា បានបាត់បង់ជីវិតភ្លាមៗ ក្រោយពេលទទួលការចាក់ថ្នាំ។

យោងតាមប្រភពព័ត៌មានពីគ្រួសារសព លោក កែវ សុភា បានឲ្យដឹងថា ពួកគាត់បាននាំជនរងគ្រោះទៅពិនិត្យជំងឺ និងទទួលសេវាចាក់ថ្នាំនៅគ្លីនិកខាងលើ ប៉ុន្តែក្រោយពេលចាក់ថ្នាំរួច ជនរងគ្រោះបានបង្ហាញរោគសញ្ញាខុសប្រក្រតី និងបានស្លាប់ភ្លាមៗនៅទីតាំងកើតហេតុ។

ហេតុការណ៍នេះបានកើតឡើងនៅវេលាម៉ោង១០៖២៥នាទីព្រឹក ថ្ងៃច័ន្ទ ទី៣០ ខែមីនា ឆ្នាំ២០២៦ ស្ថិតនៅភូមិឃ្លាំងសម្បត្តិ ឃុំពត់ស ស្រុកបាទី ខេត្តតាកែវ។

ក្រោយកើតហេតុ គ្រួសារជនរងគ្រោះបានបង្ហាញការសោកស្ដាយយ៉ាងខ្លាំង និងបានដង្ហើយស្រែកទាមទារឲ្យអាជ្ញាធរពាក់ព័ន្ធ ចូលរួមស៊ើបអង្កេត និងស្វែងរកយុត្តិធម៌ជូនជនរងគ្រោះ ដោយពួកគាត់សង្ស័យថា ការចាក់ថ្នាំអាចជាមូលហេតុនាំឲ្យបាត់បង់ជីវិត។

យ៉ាងណាក៏ដោយ ព័ត៌មានខាងលើ គឺជាការលើកឡើងតែមួយភាគីពីគ្រួសារជនរងគ្រោះប៉ុណ្ណោះ ខណៈដែលភាគីគ្លីនិក និងគ្រូពេទ្យពាក់ព័ន្ធ មិនទាន់បានចេញមកបកស្រាយ ឬផ្តល់ព័ត៌មានបន្ថែមជាសាធារណៈនៅឡើយទេ។

អាជ្ញាធរមូលដ្ឋាន និងស្ថាប័នពាក់ព័ន្ធ ត្រូវបានរំពឹងថានឹងចូលរួមស៊ើបអង្កេតយ៉ាងម៉ត់ចត់ ដើម្បីបញ្ជាក់ពីមូលហេតុពិតប្រាកដនៃការស្លាប់ និងធានាបាននូវភាពត្រឹមត្រូវ និងយុត្តិធម៌សម្រាប់គ្រប់ភាគីពាក់ព័ន្ធ។ ទាក់ទិនករណីខាងលើនេះ អង្គភាព The Mirror News ពុំអាចសុំការបំភ្លឺពីលោកគ្រូពេទ្យ ប៊ូ ប៊ុណ្ណា បានទេ ដោយទូរស័ព្ទខលចូលប៉ុន្តែពុំមានមនុស្សលើកនោះទេ។ គួរជម្រាបជូនថា អង្គភាព The Mirror News នៅតែរង់ចាំទទួលរាល់ការបំភ្លឺពីគ្រប់ភាគីពាក់ព័ន្ធ៕ ប្រភព៖ ទូច សុភ័ក្រ្ត