អាជ្ញាធរក្រុងអរិយក្សត្រចុះបិទការដ្ឋានសំណង់អត់ច្បាប់ភ្លាមៗ បង្ហាញពីភាពម៉ឺងម៉ាត់ក្នុងការអនុវត្តច្បាប់ និងការពារសណ្តាប់ធ្នាប់សាធារណៈ

(កណ្តាល)៖ រដ្ឋបាលក្រុងអរិយក្សត្រ ក្រោមការដឹកនាំយ៉ាងសកម្ម និងមានទំនួលខុសត្រូវខ្ពស់របស់លោក ចាន់ តារា អភិបាលនៃគណៈអភិបាលក្រុង បានបន្តបង្ហាញពីឆន្ទៈរឹងមាំក្នុងការអនុវត្តច្បាប់ ដោយបានចុះបិទការដ្ឋានសំណង់មួយកន្លែងភ្លាមៗ បន្ទាប់ពីរកឃើញថា សាងសង់ដោយគ្មានលិខិតអនុញ្ញាតត្រឹមត្រូវ។

ការដ្ឋានសំណង់ខាងលើ ជាកម្មសិទ្ធិរបស់លោក លីវ តុងមីន និងលោក ឡេង ខេង ស្ថិតនៅក្បាលដីលេខ ១៣៨៩ ភូមិអរិយក្សត្រ សង្កាត់អរិយក្សត្រ ក្រុងអរិយក្សត្រ ខេត្តកណ្តាល ដែលបានបើកដំណើរការសាងសង់ដោយមិនមានទាំងលិខិតអនុញ្ញាតសាងសង់ និងលិខិតបើកការដ្ឋានសាងសង់ តាមបទប្បញ្ញត្តិច្បាប់ជាធរមាន។

យោងតាមអនុក្រឹត្យលេខ ២២៤ អនក្រ.បក ចុះថ្ងៃទី៣០ ខែធ្នូ ឆ្នាំ២០២០ និងប្រកាសរួមលេខ ១២២៩ ប្រក.មផ.ដនសខ ចុះថ្ងៃទី២១ ខែមេសា ឆ្នាំ២០០៩ អាជ្ញាធរមានសិទ្ធិនិងភារកិច្ចក្នុងការទប់ស្កាត់ និងអនុវត្តវិធានការលើសំណង់ណាដែលសាងសង់ដោយគ្មានច្បាប់អនុញ្ញាត ឬអនុវត្តខុសពីលិខិតអនុញ្ញាត។

ជាក់ស្តែង កន្លងមក រដ្ឋបាលក្រុងអរិយក្សត្របានចុះណែនាំ និងចេញសេចក្តីជូនដំណឹងជាច្រើនលើក ដើម្បីឱ្យម្ចាស់សំណង់ផ្អាកការដ្ឋាន និងរក្សាស្ថានភាពដើមជាបណ្ដោះអាសន្ន ប៉ុន្តែម្ចាស់សំណង់នៅតែបន្តអំពើរឹងរូស មិនអនុវត្តតាមការណែនាំ និងបន្តសាងសង់ដោយលួចលាក់។

ដោយមិនអនុញ្ញាតឱ្យមានការបំពានច្បាប់បន្តទៀត នៅថ្ងៃទី៣០ ខែមីនា ឆ្នាំ២០២៦ រដ្ឋបាលក្រុងអរិយក្សត្របានចេញវិធានការដាច់ខាត ដោយបញ្ជាឱ្យផ្អាកសកម្មភាពសាងសង់ភ្លាមៗ ហើយបានព្រមានថា ប្រសិនបើម្ចាស់សំណង់នៅតែមិនសហការណ៍ អាជ្ញាធរនឹងអនុវត្តវិធានការរដ្ឋបាលរុះរើ ដោយមិនទទួលខុសត្រូវចំពោះការខូចខាត ឬបាត់បង់សម្ភារៈណាមួយឡើយ ព្រមទាំងអាចបន្តនីតិវិធីច្បាប់ ដោយបញ្ជូនសំណុំរឿងទៅតុលាការផងដែរ។

សកម្មភាពរហ័សរហួន និងម៉ឺងម៉ាត់នេះ ត្រូវបានមើលឃើញថា ជាគំរូល្អមួយក្នុងការគ្រប់គ្រងរដ្ឋបាលមូលដ្ឋាន ដែលមិនត្រឹមតែអនុវត្តច្បាប់ដោយតឹងរឹងប៉ុណ្ណោះទេ ប៉ុន្តែថែមទាំងការពារបាននូវសណ្តាប់ធ្នាប់ សុវត្ថិភាព និងរបៀបរៀបរយសាធារណៈនៅក្នុងមូលដ្ឋានផងដែរ។

ជាមួយគ្នានេះផងដែរ វាបង្ហាញឱ្យឃើញពីការប្តេជ្ញាចិត្តរបស់អាជ្ញាធរ ក្នុងការទប់ស្កាត់សំណង់អនាធិបតេយ្យ ដែលអាចបង្កហានិភ័យដល់សង្គម និងប៉ះពាល់ដល់ការអភិវឌ្ឍន៍ប្រកបដោយចីរភាព។

រដ្ឋបាលក្រុងអរិយក្សត្រ ក៏បានអំពាវនាវដល់ប្រជាពលរដ្ឋ និងម្ចាស់គម្រោងសំណង់ទាំងអស់ សូមគោរពនីតិវិធីច្បាប់ ធ្វើការស្នើសុំអនុញ្ញាតឱ្យបានត្រឹមត្រូវ មុននឹងចាប់ផ្តើមសាងសង់ ដើម្បីចៀសវាងការប្រឈមមុខនឹងវិធានការផ្លូវច្បាប់ និងការខាតបង់អនាគត៕