សម្ដេចធិបតី ហ៊ុន ម៉ាណែត បញ្ជាឱ្យស្រាវជ្រាវករណីគ្រោះថ្នាក់ចរាចរណ៍ស្លាប់៦នាក់នៅបាត់ដំបង អះអាងអនុវត្តច្បាប់ដោយគ្មានលើកលែង

(ភ្នំពេញ)៖ សម្ដេចធិបតី ហ៊ុន​ ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញការយកចិត្តទុកដាក់ខ្ពស់ចំពោះករណីគ្រោះថ្នាក់ចរាចរណ៍ដ៏រន្ធត់មួយ ដែលបានកើតឡើងនៅយប់ថ្ងៃទី២៧ ខែមីនា ឆ្នាំ២០២៦ នៅស្រុកមោងឬស្សី ខេត្តបាត់ដំបង បណ្ដាលឱ្យមនុស្សចំនួន៦នាក់បាត់បង់ជីវិត រួមទាំងទារកនៅក្នុងផ្ទៃមាតាផងដែរ ខណៈជនបង្កបានបើករថយន្តរត់គេចខ្លួនបាត់ពីកន្លែងកើតហេតុ។

ក្នុងសេចក្ដីថ្លែងការណ៍ សម្ដេចធិបតីបានចូលរួមរំលែកមរណទុក្ខយ៉ាងជ្រាលជ្រៅជាមួយគ្រួសារជនរងគ្រោះទាំងអស់ និងបានអំពាវនាវឱ្យវិញ្ញាណក្ខន្ធអ្នកស្លាប់បានទៅកាន់សុខគតិភព។ ជាមួយគ្នានេះ សម្ដេចក៏បានយកចិត្តទុកដាក់ចំពោះការព្រួយបារម្ភរបស់សាធារណជន ដែលសង្ស័យថា ជនបង្កអាចគេចផុតពីការទទួលខុសត្រូវ ដោយសារតែមានខ្សែស្រឡាយជាមន្ត្រី។

ដើម្បីធានាបាននូវយុត្តិធម៌ សម្ដេចធិបតីបានចេញបទបញ្ជាដល់ ឯកឧត្ដម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និង ឯកឧត្ដម ស​ ថេត អគ្គស្នងការនគរបាលជាតិឱ្យដឹកនាំការស្រាវជ្រាវយ៉ាងម៉ឺងម៉ាត់ ស្វែងរកអ្នកបើកបរពិតប្រាកដ និងអនុវត្តច្បាប់ឱ្យបានតឹងរឹងបំផុត ដោយគ្មានការលើកលែង។

សម្ដេចធិបតីក៏បានអំពាវនាវដល់ប្រជាពលរដ្ឋទូទាំងប្រទេស ឱ្យបង្កើនការប្រុងប្រយ័ត្នក្នុងការបើកបរ និងគោរពច្បាប់ចរាចរណ៍ផ្លូវគោកយ៉ាងម៉ឺងម៉ាត់ ជាពិសេសនៅក្នុងអំឡុងពេលបុណ្យចូលឆ្នាំប្រពៃណីជាតិខ្មែរ ដែលជាឱកាសមានចរាចរណ៍ច្រើន និងហានិភ័យខ្ពស់។

ជាមួយគ្នានេះ សម្ដេចបានរំលឹកយ៉ាងតឹងរឹងថា ការបើកបរដោយមិនគោរពច្បាប់ ជាពិសេសការបើកបរនៅក្រោមឥទ្ធិពលគ្រឿងស្រវឹង ដែលបង្កគ្រោះថ្នាក់ដល់អាយុជីវិតអ្នកដទៃ នឹងត្រូវទទួលទោសតាមច្បាប់យ៉ាងម៉ឺងម៉ាត់ ដោយគ្មានការលើកលែងឡើយ។

សម្ដេចធិបតីក៏បានណែនាំឱ្យគណៈបញ្ជាការឯកភាពរាជធានី-ខេត្ត និងសមត្ថកិច្ចពាក់ព័ន្ធទាំងអស់ បន្តពង្រឹងការអនុវត្តវិធានការសុវត្ថិភាពចរាចរណ៍ផ្លូវគោកឱ្យបានមានប្រសិទ្ធភាពខ្ពស់ ដើម្បីការពារអាយុជីវិត និងសុវត្ថិភាពរបស់ប្រជាពលរដ្ឋ ក្នុងអំឡុងពេលធ្វើដំណើរទៅស្រុកកំណើត និងដំណើរកម្សាន្តនាពេលខាងមុខ៕