ឯកឧត្តម គួច ចំរើន ទទួលជួបក្រុមហ៊ុនអន្តរជាតិ ពិភាក្សាអភិវឌ្ឍន៍ និងពិនិត្យវឌ្ឍនភាពសំណង់អគារដ្ឋបាល

(កណ្ដាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល នៅរសៀលថ្ងៃទី៣០ ខែមីនា ឆ្នាំ២០២៦ បានទទួលជួបសម្តែងការគួរសម និងពិភាក្សាការងារជាមួយតំណាងក្រុមហ៊ុន ST Engineering និងក្រុមហ៊ុន Krislite នៅសាលប្រជុំសាលាខេត្ត។

កិច្ចពិភាក្សានេះផ្តោតលើការសហការអភិវឌ្ឍន៍វិស័យបច្ចេកវិទ្យា វិស្វកម្ម និងប្រព័ន្ធបំភ្លឺ ដែលអាចចូលរួមលើកកម្ពស់ហេដ្ឋារចនាសម្ព័ន្ធ និងបរិយាកាសវិនិយោគនៅក្នុងខេត្តកណ្ដាល។ គួរបញ្ជាក់ថា ST Engineering ជាក្រុមហ៊ុនបច្ចេកវិទ្យា និងវិស្វកម្មចម្រុះលំដាប់អន្តរជាតិ ខណៈ Krislite ជាក្រុមហ៊ុនឈានមុខក្នុងវិស័យផ្គត់ផ្គង់ឧបករណ៍បំភ្លឺ ដែលមានសកម្មភាពយ៉ាងសកម្មនៅកម្ពុជា។

បន្ទាប់ពីកិច្ចជួបពិភាក្សា ឯកឧត្តមអភិបាលខេត្តបានអញ្ជើញតំណាងក្រុមហ៊ុនទាំងពីរ និងក្រុមការងារ ចុះពិនិត្យវឌ្ឍនភាពការងារសាងសង់អគារដ្ឋបាលខេត្តកណ្ដាល ដែលកំពុងដំណើរការសាងសង់នៅសង្កាត់ដើមមៀន ក្រុងតាខ្មៅ។

សកម្មភាពនេះបង្ហាញពីការប្តេជ្ញាចិត្តរបស់អាជ្ញាធរខេត្ត ក្នុងការពង្រឹងកិច្ចសហប្រតិបត្តិការជាមួយវិស័យឯកជនអន្តរជាតិ ដើម្បីជំរុញការអភិវឌ្ឍន៍ប្រកបដោយចីរភាព និងប្រសិទ្ធភាពក្នុងតំបន់៕