អភិបាលខេត្តកណ្ដាលដឹកនាំប្រជុំកំណត់ព្រំប្រទល់រដ្ឋបាល ជំរុញអនុវត្តឱ្យមានប្រសិទ្ធភាពមុនចូលឆ្នាំខ្មែរ

(កណ្ដាល)៖ នៅព្រឹកថ្ងៃទី៣០ ខែមីនា ឆ្នាំ២០២៦ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានអញ្ជើញដឹកនាំកិច្ចប្រជុំគណៈកម្មការ ដើម្បីពិនិត្យ និងកំណត់ព្រំប្រទល់រដ្ឋបាលរាជធានី ខេត្ត ក្រុង ស្រុក ឃុំ សង្កាត់ ដែលនៅមិនទាន់មានភាពច្បាស់លាស់ ដោយមានការចូលរួមពីមន្ទីរអង្គភាពពាក់ព័ន្ធ អាជ្ញាធរក្រុង-ស្រុក ឃុំ-សង្កាត់ និងមន្ត្រីជំនាញ។

ក្នុងកិច្ចប្រជុំ ឯកឧត្តមអភិបាលខេត្ត បានអំពាវនាវឱ្យភាគីពាក់ព័ន្ធទាំងអស់ រួមគ្នាផ្តល់មតិយោបល់ និងទិន្នន័យពាក់ព័ន្ធ ដើម្បីធ្វើការកែសម្រួល និងកំណត់ព្រំប្រទល់ឱ្យបានត្រឹមត្រូវ ស្របតាមស្ថានភាពជាក់ស្តែង សំដៅលើកកម្ពស់ប្រសិទ្ធភាពក្នុងការគ្រប់គ្រង និងការផ្តល់សេវាសាធារណៈជូនប្រជាពលរដ្ឋ។

ជាមួយគ្នានេះ ឯកឧត្តមក៏បានជំរុញឱ្យអាជ្ញាធរក្រុង-ស្រុក បន្តអនុវត្តនូវអ្វីដែលបានឯកភាពគ្នា ដោយគោរពតាមនិតិវិធី និងនិយាមការវាស់វែងឱ្យបានត្រឹមត្រូវ ព្រមទាំងត្រៀមឯកសារពាក់ព័ន្ធឱ្យបានរួចរាល់ មុនពិធីបុណ្យចូលឆ្នាំប្រពៃណីជាតិខ្មែរ ដើម្បីបញ្ជូនទៅក្រសួងមហាផ្ទៃឱ្យទាន់ពេលវេលា។

កិច្ចប្រជុំនេះបង្ហាញពីការយកចិត្តទុកដាក់ខ្ពស់របស់អាជ្ញាធរខេត្ត ក្នុងការរៀបចំប្រព័ន្ធរដ្ឋបាលឱ្យមានភាពច្បាស់លាស់ ត្រឹមត្រូវ និងមានប្រសិទ្ធភាព ដើម្បីបម្រើផលប្រយោជន៍ប្រជាពលរដ្ឋយ៉ាងល្អប្រសើរ៕