វីដេអូករណីហិង្សាដោយចេតនានៅស្រុកមុខកំពូលគឺជាវិដេអូចាស់តាំងពីឆ្នាំ២០២៤

(កណ្ដាល)៖ «ពាក់ព័ន្ធនឹងការចែកចាយវីដេអូករណីហិង្សាដោយចេតនា នៅស្រុកមុខកំពូល ខេត្តកណ្តាល ដែលត្រូវបានម្ចាស់ផេកហ្វេសប៊ុកមួយចំនួន ដូចជា NOEUN, AEmK និងផេកផ្សេងទៀត យកមកកាត់ត និងបង្ហោះផ្សព្វផ្សាយឡើងវិញ នាំឲ្យមានការយល់ច្រឡំក្នុងចំណោមសាធារណជន»។ នេះបើតាមសេចក្តីប្រកាសព័ត៌មានរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាលដែលអង្គភាព The Mirror News ទទួលបាននៅថ្ងៃទី៣០ ខែមីនា ឆ្នាំ២០២៦នេះ។

ប្រភពបញ្ជាក់ច្បាស់ៗថា «វីដេអូខាងលើ គឺជាករណីចាស់ ដែលបានកើតឡើងតាំងពីឆ្នាំ២០២៤ ហើយសមត្ថកិច្ចបានចាត់វិធានការតាមនីតិវិធីច្បាប់រួចរាល់ហើយ»។

ជាមួយគ្នានេះ ស្នងការដ្ឋាននគរបាលខេត្តកណ្តាល សូមអំពាវនាវដល់ម្ចាស់ផេកពាក់ព័ន្ធ ឲ្យបញ្ឈប់ការចែកចាយ និងលុបមាតិកាខាងលើជាបន្ទាន់។ ក្នុងករណីមិនអនុវត្តតាម អាជ្ញាធរនឹងចាត់វិធានការតាមច្បាប់ជាធរមាន។

អាស្រ័យហេតុនេះ សូមសាធារណជនមេត្តាពិនិត្យផ្ទៀងផ្ទាត់ព័ត៌មានឲ្យបានច្បាស់លាស់ មុននឹងចែករំលែក និងសូមកុំបន្តផ្សព្វផ្សាយវីដេអូខាងលើបន្តទៀត ដើម្បីជៀសវាងការយល់ច្រឡំ និងរក្សាសន្តិសុខសង្គម៕