សំណុំរឿងគ្រូបង្រៀនប្រើហិង្សាលើសិស្ស នៅខេត្តពោធិ៍សាត់ មិនទាន់រកយុត្តិធម៌ ខណៈមានការចូលរួមជួយពីភាគីពាក់ព័ន្ធ!

(ភ្នំពេញ)៖ ករណីគ្រូបង្រៀនម្នាក់ ត្រូវបានចោទប្រកាន់ថា បានប្រើអំពើហិង្សាទៅលើសិស្ស បណ្ដាលឲ្យរងរបួសធ្ងន់រហូតដល់ត្រូវវះកាត់ នៅតែបន្តទទួលបានការចាប់អារម្មណ៍ពីសាធារណជន ខណៈរឿងនេះត្រូវបានលើកឡើងថា មិនទាន់មានដំណោះស្រាយយុត្តិធម៌ច្បាស់លាស់នៅឡើយទេ។

យោងតាមការបង្ហោះរបស់លោក ផែង វណ្ណៈ អ្នកប្រើប្រាស់បណ្ដាញសង្គមហ្វេសប៊ុកដ៏មានឥទ្ធិពលបានឲ្យដឹងថា លោកបានផ្ដល់ថវិកាចំនួន២លានរៀល ដល់ក្មួយប្រុសដែលជាសិស្សរងគ្រោះ ក្នុងហេតុការណ៍ដែលលោកគ្រូឈ្មោះ សេន សុថៃ បានទាត់ធាក់បណ្ដាលឲ្យរបួសធ្ងន់។ ហេតុការណ៍នេះ បានកើតឡើងនៅវិទ្យាល័យ ព្រះម្លូរ ស្ថិតក្នុងភូមិចាយ៉ូវ ឃុំមេទឹក ស្រុកបាកាន ខេត្តពោធិ៍សាត់ កាលពីចុងឆ្នាំ២០២៥។

ប្រភពដដែលបន្តថា រហូតមកដល់ពេលនេះ សិស្សរងគ្រោះនៅមិនទាន់ទទួលបានយុត្តិធម៌សមរម្យនៅឡើយទេ ខណៈគ្រួសារនិងសាធារណជនកំពុងរង់ចាំការចូលរួមដោះស្រាយពីអាជ្ញាធរ និងស្ថាប័នពាក់ព័ន្ធ ជាពិសេសក្រសួងអប់រំ យុវជន និងកីឡា។

ជាមួយគ្នានេះផងដែរ លោកឧត្ដមសេនីយ៍ទោ ហ៊ុន គឹមជាតិ ក៏បានបង្ហាញចំណាប់អារម្មណ៍លើករណីនេះ ដោយបានលើកឡើងថា នឹងមានការរៀបចំឲ្យមានជំនួបពាក់ព័ន្ធ ដើម្បីស្វែងរកដំណោះស្រាយជូនជនរងគ្រោះ ដោយមានការចូលរួមពីភាគីពាក់ព័ន្ធផងដែរ។

ករណីនេះបានបង្កការព្រួយបារម្ភយ៉ាងខ្លាំងពីសាធារណជន ពាក់ព័ន្ធនឹងសុវត្ថិភាពសិស្សានុសិស្សក្នុងបរិវេណសាលារៀន និងតួនាទីគ្រូបង្រៀនក្នុងការអប់រំដោយគ្មានអំពើហិង្សា។

សាធារណជនជាច្រើនបានអំពាវនាវឲ្យមានការស៊ើបអង្កេតយ៉ាងតឹងរឹង និងផ្ដល់យុត្តិធម៌ឲ្យបានឆាប់រហ័ស ដើម្បីរក្សាទុកកិត្តិយសវិជ្ជាជីវៈគ្រូបង្រៀន និងការពារសិទ្ធិសិស្ស៕