ជំរុញគុណភាពអប់រំ! ឯកឧត្តម ហង់ជួន ណារ៉ុន ចុះសំណេះសំណាល និងដាក់ទិសដៅអភិវឌ្ឍវិទ្យាល័យគំរូនៅផ្សារដើមថ្កូវ

(ភ្នំពេញ)៖ ឯកឧត្តម ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡានារសៀលថ្ងៃទី៣០ ខែមីនា ឆ្នាំ២០២៦នេះ បានដឹកនាំប្រតិភូចុះទស្សនកិច្ច និងសំណេះសំណាលជាមួយបុគ្គលិកអប់រំ នៅ វិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ ដោយមានការចូលរួមពីថ្នាក់ដឹកនាំមន្ទីរ អ្នកគ្រប់គ្រងសាលា និងលោកគ្រូ អ្នកគ្រូយ៉ាងច្រើនកុះករ។

បន្ទាប់ពីស្តាប់របាយការណ៍សាលា ឯកឧត្តមបានវាយតម្លៃខ្ពស់ចំពោះវឌ្ឍនភាពគុណភាពអប់រំ ជាពិសេសអត្រាប្រឡងជាប់សញ្ញាបត្រមធ្យមសិក្សាទុតិយភូមិ ដែលបានកើនឡើងពី ៥៣% ដល់ ៧៥% ក្នុងរយៈពេល ១០ឆ្នាំចុងក្រោយ រួមជាមួយកំណើននិទ្ទេស A B និង C គួរឱ្យកត់សម្គាល់។ ឯកឧត្តមបានសង្កត់ធ្ងន់ថា លទ្ធផលវិជ្ជមានទាំងនេះ បង្ហាញពីភាពខិតខំប្រឹងប្រែង និងការលះបង់ខ្ពស់របស់គណៈគ្រប់គ្រង និងក្រុមគ្រូបង្រៀន។

ក្នុងនាមជាអ្នកដឹកនាំវិស័យអប់រំ ឯកឧត្តមបានលើកឡើងថា គុណភាពអប់រំត្រូវដើរទន្ទឹមនឹងវិន័យ និងសីលធម៌ ដោយណែនាំឱ្យពង្រឹងការគ្រប់គ្រងបរិស្ថានសាលា ជាពិសេសការរៀបចំសំរាម និងអនាម័យក្នុងថ្នាក់រៀន និងតូបអាហារ តាមរយៈយន្តការត្រួតពិនិត្យជាប្រចាំ និងការចូលរួមពីក្រុមយុវជន និងកាយរឹទ្ធិ។

ជាមួយគ្នានេះ ឯកឧត្តមបានដាក់ចេញទិសដៅច្បាស់លាស់ក្នុងការអភិវឌ្ឍសាលាឱ្យក្លាយជាវិទ្យាល័យគំរូ ដោយផ្តោតលើការលើកកម្ពស់សមត្ថភាពគ្រូបង្រៀន និងការប្រើប្រាស់បច្ចេកវិទ្យាឌីជីថលក្នុងការបង្រៀន។ ក្រសួងនឹងបន្តគាំទ្រការបង្កើតបរិក្ខារបច្ចេកវិទ្យា ដើម្បីធានាប្រសិទ្ធភាពនៃការសិក្សាឲ្យសមស្របនឹងយុគសម័យថ្មី។

ឯកឧត្តមក៏បានអំពាវនាវឱ្យមាតាបិតា និងអ្នកអាណាព្យាបាល ចូលរួមគាំទ្រការសិក្សារបស់កូនៗ និងសហការជាមួយសាលា ដើម្បីរួមចំណែកលើកកម្ពស់គុណភាពអប់រំ និងអភិវឌ្ឍធនធានមនុស្សឲ្យកាន់តែមានប្រសិទ្ធភាព ស្របតាមចក្ខុវិស័យរបស់រាជរដ្ឋាភិបាលកម្ពុជា៕