ក្រោយខ្នងអ្នកការពារជាតិ៖ អាជ្ញាធរខេត្តកណ្ដាលឈានមុខជួយគ្រួសារវីរៈកងទ័ព!

(កណ្ដាល)៖ នៅព្រឹកថ្ងៃទី៣០ ខែមីនា ឆ្នាំ២០២៦ នៅសាលាខេត្តកណ្ដាល ឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល បានអញ្ជើញជួបសំណេះសំណាលដោយផ្ទាល់ជាមួយគ្រួសារវីរៈកងទ័ពមួយគ្រួសារ ដែលកំពុងប្រឈមមុខនឹងបញ្ហាជីវភាពលំបាក ខណៈដែលមេគ្រួសារកំពុងបំពេញភារកិច្ចដ៏សំខាន់ក្នុងការការពារបូរណភាពទឹកដីតាមបណ្ដោយព្រំដែន។

គ្រួសារនេះមានកូនចំនួនបួននាក់ក្នុងបន្ទុក ហើយកំពុងខ្វះការថែទាំពីឪពុក ដែលបានលះបង់ពេលវេលា និងកម្លាំងក្នុងការឈរជើងការពារជាតិ។ ស្ថានភាពនេះបានបង្ហាញយ៉ាងច្បាស់ពីការលះបង់ដ៏ធំធេងរបស់យោធិនម្នាក់ ដែលមិនត្រឹមតែបម្រើជាតិប៉ុណ្ណោះទេ ប៉ុន្តែគ្រួសាររបស់គាត់ក៏ត្រូវទទួលរងផលប៉ះពាល់ផ្ទាល់ផងដែរ។

ក្នុងឱកាសនោះ ឯកឧត្ដមអភិបាលខេត្ត បាននាំមកនូវការផ្ដាំផ្ញើសួរសុខទុក្ខពីសំណាក់ប្រមុខដឹកនាំជាតិ រួមមាន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនដល់គ្រួសារវីរៈកងទ័ព ដោយសេចក្ដីគោរព និងការដឹងគុណចំពោះការលះបង់ដ៏ថ្លៃថ្នូរ។

ឯកឧត្ដម គួច ចំរើន បានគូសបញ្ជាក់ថា ប្រមុខរាជរដ្ឋាភិបាលតែងតែផ្តល់អាទិភាពខ្ពស់ដល់សុខុមាលភាពប្រជាពលរដ្ឋ ជាពិសេសគ្រួសារយោធិន និងកងកម្លាំងប្រដាប់អាវុធដែលកំពុងបំពេញបេសកកម្មការពារជាតិ។ ទន្ទឹមនឹងនេះ អាជ្ញាធរគ្រប់លំដាប់ថ្នាក់ត្រូវបន្តតាមដាន និងដោះស្រាយបញ្ហាជីវភាពប្រជាពលរដ្ឋឲ្យបានទាន់ពេលវេលា ដើម្បីធានាថាមិនមាននរណាម្នាក់ត្រូវទុកឲ្យរស់នៅក្នុងភាពកណ្ដោចកណ្ដែងឡើយ។

ជាក់ស្តែង ក្នុងវិធានការជួយសង្គ្រោះ ឯកឧត្ដមអភិបាលខេត្ត បានណែនាំឲ្យអង្គការ ហូលី ស្ថិតនៅឃុំបឹងខ្យាង ស្រុកកណ្តាលស្ទឹង ចូលរួមទទួលបន្ទុកថែទាំ និងផ្តល់ឱកាសអប់រំដល់កូនទាំងបួននាក់ ដើម្បីធានាថាកុមារទាំងនេះ ទទួលបានសិទ្ធិក្នុងការសិក្សា និងអភិវឌ្ឍសមត្ថភាពយ៉ាងពេញលេញ ខណៈឪពុកកំពុងបំពេញភារកិច្ចជាតិដោយមិនអាចនៅក្បែរគ្រួសារ។

ក្រៅពីនេះ អាជ្ញាធរខេត្តកណ្ដាល ក៏បានផ្តល់ជំនួយឧបត្ថម្ភជាក់ស្តែង ដល់អង្គការ ហូលី រួមមាន ថវិកា ៥លានរៀល អង្ករ ២តោន មី ២០កេស ត្រីខ ២០យួរ និងទឹកសុទ្ធ ១០០កេស។ ចំណែកគ្រួសារវីរៈកងទ័ព ទទួលបានថវិកា ៣លានរៀល ខណៈកូនៗទាំងបួននាក់ ទទួលបានកាតាប សម្ភារៈសិក្សា និងសម្លៀកបំពាក់ ដើម្បីសម្រួលដល់ការសិក្សា និងជីវភាពប្រចាំថ្ងៃ។

សកម្មភាពនេះ មិនត្រឹមតែជាការជួយសង្គ្រោះបន្ទាន់ប៉ុណ្ណោះទេ ប៉ុន្តែជាសញ្ញាបង្ហាញពីស្មារតីមនុស្សធម៌ ការយកចិត្តទុកដាក់ និងការទទួលខុសត្រូវរបស់អាជ្ញាធរមូលដ្ឋាន ក្នុងការថែរក្សាសុខុមាលភាពប្រជាពលរដ្ឋ។ ជាពិសេស វាជាការបញ្ជាក់ថា គ្រួសារយោធិន ដែលជាខ្នងសមុទ្រនៃសន្តិភាព និងសុវត្ថិភាពជាតិ មិនត្រូវបានភ្លេចឡើយ ក្នុងការគាំទ្រពីរដ្ឋ និងសង្គមទាំងមូល៕