កម្លាំងនគរបាលពងទឹកបង្ក្រាបក្រុមជនសង្ស័យ៤នាក់ ប៉ុនប៉ងប្លន់ម៉ូតូក្នុងរាជធានីភ្នំពេញ

(ភ្នំពេញ)៖ កម្លាំងប៉ុស្តិ៍នគរបាលរដ្ឋបាលពងទឹក នៃអធិការដ្ឋាននគរបាលខណ្ឌដង្កោ បានប្រតិបត្តិការបង្ក្រាប និងឃាត់ខ្លួនក្រុមជនសង្ស័យចំនួន៤នាក់ ពាក់ព័ន្ធនឹងករណីប៉ុនប៉ងលួចមានស្ថានទម្ងន់ទោស (ប្លន់ម៉ូតូ) ខណៈពេលកំពុងរៀបចំធ្វើសកម្មភាពក្នុងភូមិសាស្ត្ររាជធានីភ្នំពេញ។

ប្រតិបត្តិការនេះ បានធ្វើឡើងកាលពីវេលាម៉ោង ២និង៣០នាទី រសៀល ថ្ងៃទី២៨ ខែមីនា ឆ្នាំ២០២៦ នៅចំណុចមុខវត្តស្លែង ស្ថិតក្នុងភូមិវត្តស្លែង សង្កាត់ពងទឹក ខណ្ឌដង្កោ។ ក្នុងនោះ សមត្ថកិច្ចបានឃាត់ខ្លួនជនសង្ស័យចំនួន៤នាក់ មានអាយុប្រមាណ ១៨ឆ្នាំ ដូចគ្នា និងមានទីលំនៅនៅខណ្ឌកំបូល រាជធានីភ្នំពេញ។

តាមរបាយការណ៍សមត្ថកិច្ច បានឲ្យដឹងថា ខណៈកម្លាំងនគរបាលកំពុងចុះល្បាតក្នុងមូលដ្ឋាន បានប្រទះឃើញក្រុមជនសង្ស័យជិះម៉ូតូចំនួន២គ្រឿង ដោយមានអាវុធជាដំបងដងឆ័ត្រ និងមានសកម្មភាពគួរឱ្យសង្ស័យ។ នៅពេលសមត្ថកិច្ចបញ្ជាឲ្យឈប់ដើម្បីត្រួតពិនិត្យ ក្រុមជនសង្ស័យបានព្យាយាមបើកម៉ូតូគេចខ្លួន ប៉ុន្តែត្រូវបានដេញតាម និងឃាត់ខ្លួនបាននៅចំណុចស្តុបតាំងរនាម ផ្លូវក្រវាត់ក្រុងទី៣ ក្នុងខណ្ឌកំបូល។

វត្ថុតាងដែលត្រូវបានដកហូត រួមមាន ម៉ូតូ២គ្រឿង ផ្លាកលេខ២ និងដំបងដងឆ័ត្រដែកប្រវែងប្រមាណ១១០សង់ទីម៉ែត្រ។ ក្រោយការសាកសួរ ជនសង្ស័យបានសារភាពថា ពួកខ្លួនបានរៀបចំធ្វើសកម្មភាពប្លន់យកម៉ូតូ ដោយដោះផ្លាកលេខម៉ូតូទុកក្រោមកែប និងប្រដាប់ដោយកាំបិតបុ័ងតោ និងដំបងដែក ដើម្បីប្រើប្រាស់ក្នុងសកម្មភាពល្មើស។ ពួកគេក៏បានបញ្ជាក់ថា មុនពេលត្រូវឃាត់ខ្លួន បានព្យាយាមឆក់ទូរស័ព្ទមួយលើកនៅតំបន់អូរដឹម និងធ្វើសកម្មភាពធាក់ផ្តួលម៉ូតូប្រជាពលរដ្ឋមួយកន្លែងទៀត ប៉ុន្តែមិនទទួលបានជោគជ័យ។

បច្ចុប្បន្ន ជនសង្ស័យទាំង៤នាក់ ត្រូវបានសមត្ថកិច្ចកសាងសំណុំរឿង បញ្ជូនទៅតុលាការ ដើម្បីចាត់ការតាមនីតិវិធីច្បាប់ ក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ៕