សមិទ្ធផលមជ្ឈមណ្ឌលវប្បធម៌ និងព្រះពុទ្ធសាសនាកម្ពុជា នៅកំពង់ស្ពឺ ត្រូវបានសម្ពោធជាផ្លូវការ បង្ហាញសក្ខីភាពនៃសន្តិភាព និងការអភិវឌ្ឍជាតិ

(កំពង់ស្ពឺ)៖ នៅថ្ងៃទី២៩ ខែមីនា ឆ្នាំ២០២៦ សមិទ្ធផលជាច្រើនក្នុងមជ្ឈមណ្ឌលវប្បធម៌ និងព្រះពុទ្ធសាសនាកម្ពុជា ស្ថិតនៅឃុំចំបក់ ស្រុកភ្នំស្រួច ខេត្តកំពង់ស្ពឺ ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ។

ក្នុងឱកាសនោះ ឯកឧត្តមបណ្ឌិតអភិបាលខេត្ត បានសំណេះសំណាលជាមួយមន្ត្រីរាជការ និងពុទ្ធបរិស័ទ ដោយសម្តែងនូវការត្រេកអរ និងមោទនភាពចំពោះសមិទ្ធផលដែលបានកើតមានឡើង។ ឯកឧត្តមបានគូសបញ្ជាក់ថា សមិទ្ធផលទាំងនេះ គឺជាផ្លែផ្កានៃ “សន្តិភាព” ដែលបង្កើតឱកាសឱ្យប្រទេសជាតិអាចកសាង និងអភិវឌ្ឍគ្រប់វិស័យ ពិសេសការលើកកម្ពស់តម្លៃវប្បធម៌ និងជំនឿសាសនា ដែលជាមូលដ្ឋានសម្រាប់សីលធម៌ និងសង្គមមានសុចរិតភាព។

ឯកឧត្តមបណ្ឌិតក៏បានលើកឡើងថា ខេត្តកំពង់ស្ពឺកំពុងមានការរីកចម្រើនយ៉ាងលឿនលើវិស័យឧស្សាហកម្ម កសិកម្ម និងទេសចរណ៍ ដែលជាដំបូងសំខាន់សម្រាប់ការលើកកម្ពស់សេដ្ឋកិច្ចមូលដ្ឋាន។ ក្នុងនោះ មជ្ឈមណ្ឌលវប្បធម៌ និងព្រះពុទ្ធសាសនាកម្ពុជា មិនត្រឹមតែជាកន្លែងអនុវត្តធម៌វិន័យប៉ុណ្ណោះទេ ប៉ុន្តែថែមទាំងជានិមិត្តរូបនៃការរួមបញ្ចូលគ្នារវាងការអភិវឌ្ឍផ្នែកស្មារតី និងការអភិរក្សអត្តសញ្ញាណជាតិ ដែលអាចទាក់ទាញភ្ញៀវទេសចរជាតិ និងអន្តរជាតិឱ្យមកទស្សនា និងសិក្សាបន្ថែមអំពីវប្បធម៌ខ្មែរ។

ជាមួយគ្នានេះ ឯកឧត្តមបណ្ឌិត ជាម ច័ន្ទសោភ័ណ បានថ្លែងអំណរគុណយ៉ាងជ្រាលជ្រៅចំពោះសប្បុរសជន និងពុទ្ធបរិស័ទទាំងក្នុង និងក្រៅប្រទេស ដែលបានចូលរួមឧបត្ថម្ភ និងកសាងសមិទ្ធផលដ៏មានតម្លៃទាំងនេះ ដើម្បីទុកជាមរតកសម្រាប់ជំនាន់ក្រោយ។ ព្រមទាំងអំពាវនាវឱ្យប្រជាពលរដ្ឋទាំងអស់ រួមគ្នារក្សាសុខសន្តិភាពឱ្យបានយូរអង្វែង ដើម្បីបន្តបង្កើតសមិទ្ធផលថ្មីៗបន្ថែមទៀត។

បន្ទាប់ពីបញ្ចប់មតិសំណេះសំណាល ឯកឧត្តមបណ្ឌិតអភិបាលខេត្ត បានអញ្ជើញកាត់ខ្សែបូសម្ពោធ និងដាក់ឱ្យប្រើប្រាស់សមិទ្ធផលជាផ្លូវការ ព្រមទាំងបានចូលរួមពិធីរាប់បាត និងប្រគេនភេសជ្ជៈដល់ព្រះសង្ឃ តាមប្រពៃណីព្រះពុទ្ធសាសនាខ្មែរ ដោយមានការចូលរួមយ៉ាងច្រើនកុះករ ពោរពេញដោយបរិយាកាសសប្បាយរីករាយ និងគោរពប្រពៃណីជាតិ៕