ក្រសួងព័ត៌មានអំពាវនាវសាធារណៈកុំចែកចាយព័ត៌មានមិនត្រឹមត្រូវ

(ភ្នំពេញ)៖  ក្រសួងព័ត៌មានបានចេញសេចក្តីជូនដំណឹងដល់សាធារណៈជន អំពីករណីមាតិកាមួយត្រូវបានផ្សព្វផ្សាយតាមគណនី Instagram ដែលបង្កការយល់ច្រឡំទាក់ទងនឹងកម្ពុជា ដោយបញ្ជាក់ថា អាជ្ញាធរកំពុងតាមដាន និងអនុវត្តវិធានការយ៉ាងយកចិត្តទុកដាក់ជាបន្តបន្ទាប់។

តាមការបញ្ជាក់ ក្រសួងបានប្រមូលភស្តុតាងពាក់ព័ន្ធនឹងមាតិកាដែលអាចបំភាន់សាធារណៈមតិ និងបង្កឥទ្ធិពលអវិជ្ជមានលើរូបភាពប្រទេស។ ក្នុងនោះ ក៏មានការសហការជាមួយក្រសួងប្រៃសណីយ៍ ដើម្បីទាក់ទងទៅកាន់ក្រុមហ៊ុនបណ្តាញសង្គមដែលពាក់ព័ន្ធ ស្នើឱ្យអនុវត្តវិធានការសមស្របចំពោះមាតិកាដែលមានលក្ខណៈបំភាន់នេះ។

ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបញ្ជាក់ថា តាមការពិនិត្យបឋម មាតិកាដែលត្រូវបានបង្ហោះដោយគណនីនោះ មិនមែនថតនៅក្នុងប្រទេសកម្ពុជានោះទេ ប៉ុន្តែអាចជាទីតាំងនៅប្រទេសជិតខាង។ ភស្តុតាងមួយចំនួនដូចជា អក្សរលើស្លាកសញ្ញា ភាសាដែលប្រើប្រាស់ក្នុងវីដេអូ និងបរិយាកាសជុំវិញ បានបង្ហាញយ៉ាងច្បាស់ថា មិនស្ថិតនៅក្នុងបរិបទសង្គមវប្បធម៌កម្ពុជាឡើយ។

ជាមួយគ្នានេះ ក្រសួងព័ត៌មានក៏បានព្យាយាមទាក់ទងទៅម្ចាស់គណនីផ្ទាល់ ដើម្បីស្នើឱ្យបញ្ឈប់ការផ្សាយមាតិកាដែលបង្កការយល់ច្រឡំ និងសូមឱ្យដកចេញមាតិកាដែលអាចប៉ះពាល់ដល់កេរ្តិ៍ឈ្មោះប្រទេស។ ការបង្ហោះនោះក៏បានជួបប្រទះនឹងការរិះគន់យ៉ាងច្រើនពីអ្នកប្រើប្រាស់បណ្តាញសង្គម ដែលបានបញ្ជាក់ថា ទីតាំងក្នុងវីដេអូ មិនមែននៅកម្ពុជា និងមិនពាក់ព័ន្ធនឹងប្រជាជនខ្មែរឡើយ។

ក្នុងនាមជាស្ថាប័នទទួលខុសត្រូវលើវិស័យព័ត៌មាន ក្រសួងបានបញ្ជាក់ថា នឹងបន្តតាមដានយ៉ាងជិតស្និទ្ធ និងអនុវត្តវិធានការចាំបាច់បន្ថែម ដើម្បីទប់ស្កាត់ការផ្សព្វផ្សាយព័ត៌មានមិនពិត និងការបំភាន់សាធារណៈមតិ។

អាស្រ័យហេតុនេះ ក្រសួងព័ត៌មានសូមអំពាវនាវដល់សាធារណៈជន ឱ្យប្រុងប្រយ័ត្នក្នុងការទទួល និងចែកចាយព័ត៌មានលើបណ្តាញសង្គម ពិសេសមាតិកាដែលមិនមានប្រភពច្បាស់លាស់។ ក៏ដូចជាអំពាវនាវឱ្យចូលរួមជាផ្នែកមួយក្នុងការការពារព័ត៌មានត្រឹមត្រូវ ដោយចូលរួមបញ្ចេញមតិពន្យល់ក្នុងមាតិកាដែលអាចបង្កការយល់ច្រឡំថា «ពុំមែននៅកម្ពុជា និងពុំមែនជាខ្មែរ»។

ការចូលរួមរបស់សាធារណៈជន គឺជាចំណុចសំខាន់ក្នុងការរក្សាបរិស្ថានព័ត៌មានឱ្យមានភាពត្រឹមត្រូវ សុចរិត និងទំនួលខុសត្រូវខ្ពស់ក្នុងសង្គមឌីជីថលសម័យថ្មី៕