កម្ពុជាបន្តបង្ហាញភាពប្តេជ្ញាចិត្តខ្ពស់ ចំពោះសន្តិភាព និងការគោរពកិច្ចព្រមព្រៀង តាមរយៈបេសកកម្មសង្កេតការណ៍អាស៊ាននៅតំបន់ព្រំដែនអូរស្មាច់

(ភ្នំពេញ)៖ នៅថ្ងៃអាទិត្យ ទី២៩ ខែមីនា ឆ្នាំ២០២៦ វេលាម៉ោង ៩:៣៣នាទីព្រឹក ក្រុមសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួលដល់ក្រុមអ្នកសង្កេតការណ៍អាស៊ាន (AOT) ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែន នៅតំបន់ច្រកអូរស្មាច់ ក្រុងសំរោង ខេត្តឧត្តរមានជ័យ ដោយផ្តោតលើការគោរព និងអនុវត្តវិធានការទាំងអស់ក្នុងសេចក្តីប្រកាសរួម បន្ទាប់ពីបទឈប់បាញ់បានចូលជាធរមាន។

យោងតាមការបញ្ជាក់ពីលោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ ការចុះសង្កេតការណ៍នេះមានគោលបំណងធានាថា ភាគីពាក់ព័ន្ធទាំងអស់បានអនុវត្តតាមកិច្ចព្រមព្រៀងយ៉ាងត្រឹមត្រូវ និងមានប្រសិទ្ធភាព ដើម្បីរក្សាស្ថិរភាព និងជៀសវាងការកើតឡើងវិញនៃភាពតានតឹងតាមបណ្តោយព្រំដែន។

គួរបញ្ជាក់ថា បេសកកម្មនេះក៏ជាផ្នែកមួយនៃការប្តូរវេនដឹកនាំរបស់ក្រុមអ្នកសង្កេតការណ៍អាស៊ានផងដែរ ដោយប្រធានក្រុមដែលចប់អាណត្តិពីប្រទេសម៉ាឡេស៊ី នឹងផ្ទេរភារកិច្ចទៅឱ្យប្រទេសហ្វីលីពីន បន្តដឹកនាំក្នុងនាមជាប្រធានអាស៊ានប្តូរវេន និងជាប្រធានក្រុមអ្នកសង្កេតការណ៍អាស៊ាន (AOT) ប្រចាំនៅកម្ពុជា។

ក្នុងបរិបទនយោបាយ និងសន្តិសុខតំបន់ រាជរដ្ឋាភិបាល និងក្រសួងការពារជាតិកម្ពុជា បានបន្តបញ្ជាក់យ៉ាងច្បាស់លាស់ពីការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ និងមានទំនួលខុសត្រូវខ្ពស់ ក្នុងការគោរព និងអនុវត្តយ៉ាងពេញលេញនូវសេចក្តីប្រកាសរួម និងកិច្ចព្រមព្រៀងពាក់ព័ន្ធទាំងអស់។

ជាក់ស្តែង កម្ពុជាបានអនុវត្តយ៉ាងខ្ជាប់ខ្ជួននូវលទ្ធផលនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៧ ខែធ្នូ ឆ្នាំ២០២៥ ក៏ដូចជាសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ កាលពីថ្ងៃទី២៦ ខែតុលា ឆ្នាំ២០២៥ ព្រមទាំងកិច្ចព្រមព្រៀងពាក់ព័ន្ធផ្សេងៗទៀត។

ការចូលរួមយ៉ាងសកម្ម និងមានតម្លាភាពក្នុងបេសកកម្មសង្កេតការណ៍អន្តរជាតិ នេះ បង្ហាញឱ្យឃើញពីតួនាទីវិជ្ជាជីវៈ និងការទទួលខុសត្រូវរបស់កម្ពុជា ក្នុងការរក្សាសន្តិភាព ស្ថិរភាព និងការជឿទុកចិត្តរវាងប្រទេសជិតខាង។ វាក៏ជាជំហានសំខាន់មួយក្នុងការជំរុញឱ្យមានការវិលត្រឡប់ទៅរកប្រក្រតីភាពយ៉ាងឆាប់រហ័ស និងការរស់នៅដោយសន្តិភាពយូរអង្វែងនៅតំបន់ព្រំដែន។ ប្រភពក្រសួងព័ត៌មាន ដោយ៖ កន ចំណាន