កុំចង់ធ្វើក្មេងទំនើងនៅកំពង់ស្ពឺ! ក្មេងទំនើង៣នាក់នៅកំពង់ស្ពឺ ត្រូវបង្ក្រាបក្រោមវិធានការ តឹងរឹងជាបន្តបន្ទាប់!

(កំពង់ស្ពឺ)៖ សកម្មភាពបង្ហោះម៉ូតូតាមដងផ្លូវសាធារណៈ ដែលធ្លាប់ត្រូវបានគេចាត់ទុកថាជាការលេងសើចរបស់ក្មេងទំនើង កំពុងបម្លែងទៅជាបញ្ហាសង្គមដែលបង្កហានិភ័យធ្ងន់ធ្ងរដល់សុវត្ថិភាពសាធារណៈ។ ករណីថ្មីមួយនៅខេត្តកំពង់ស្ពឺ បានបង្ហាញច្បាស់ថា ការអនុវត្តច្បាប់កំពុងត្រូវបានរឹតបន្តឹង ដើម្បីទប់ស្កាត់អាកប្បកិរិយាអនាធិបតេយ្យនេះ។

កាលពីវេលាម៉ោង ៣:១០ នាទីរំលងអធ្រាត្រ ថ្ងៃទី២៥ ខែមីនា ឆ្នាំ២០២៦ កម្លាំងកងរាជអាវុធហត្ថខេត្តកំពង់ស្ពឺ បានចុះបង្ក្រាប និងឃាត់ខ្លួនក្មេងទំនើងចំនួន៣នាក់ ពាក់ព័ន្ធនឹងសកម្មភាពបង្ហោះម៉ូតូ នៅលើផ្លូវជាតិលេខ៤ ត្រង់ចំណុចភូមិព្រៃស្លឹក សង្កាត់ច្បាមន ក្រុងច្បាមន។

ប្រតិបត្តិការនេះ ត្រូវបានអនុវត្តក្រោមការណែនាំរបស់ឯកឧត្តមបណ្ឌិត ជាម ច័ន្ទសោភ័ណ និងការដឹកនាំផ្ទាល់យ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ ក្នុងគោលបំណងបង្ក្រាប និងទប់ស្កាត់សកម្មភាពក្មេងទំនើង ដែលបង្កគ្រោះថ្នាក់ដល់សង្គម។

យោងតាមរបាយការណ៍ ក្រុមយុវជនទាំង៣នាក់ មានអាយុចាប់ពី១៥ ដល់១៨ឆ្នាំ ត្រូវបានឃាត់ខ្លួនជាមួយវត្ថុតាង រួមមាន ម៉ូតូមួយគ្រឿង និងទូរស័ព្ទចំនួន៣គ្រឿង។ បច្ចុប្បន្ន ពួកគេត្រូវបានយកមកអប់រំ ធ្វើកិច្ចសន្យាបញ្ឈប់សកម្មភាព និងដកហូតម៉ូតូរក្សាទុករយៈពេល៣ខែ តាមនីតិវិធី។

វិធានការនេះ ស្របតាមគោលការណ៍ដ៏ម៉ឺងម៉ាត់របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី ដែលបានណែនាំឲ្យអាជ្ញាធរអនុវត្តវិធានការតឹងរឹងចំពោះក្មេងទំនើង ជាពិសេសសកម្មភាពបង្ហោះម៉ូតូ ដែលគំរាមកំហែងដល់ជីវិតអ្នកប្រើប្រាស់ផ្លូវ។

ទោះជាយ៉ាងណា ករណីនេះ ក៏បង្ហាញពីបញ្ហាជ្រាលជ្រៅមួយក្នុងសង្គម គឺការខ្វះការយល់ដឹង និងការគ្រប់គ្រងខ្លួនរបស់យុវជនមួយចំនួន ដែលយកផ្លូវសាធារណៈធ្វើជាកន្លែងបង្ហាញខ្លួន ដោយមិនគិតពីផលវិបាក។

អ្នកជំនាញមើលឃើញថា ការបង្ក្រាបតែប៉ុណ្ណោះមិនគ្រប់គ្រាន់ទេ តែត្រូវភ្ជាប់ជាមួយការអប់រំគ្រួសារ សាលារៀន និងសង្គមទាំងមូល ដើម្បីបង្កើតវិន័យ និងការទទួលខុសត្រូវក្នុងចិត្តយុវជន។

ព្រោះចុងក្រោយនេះ “ការលេងសើចមួយភ្លែត” អាចក្លាយជាគ្រោះថ្នាក់មួយជីវិត មិនត្រឹមសម្រាប់ខ្លួនឯង ប៉ុន្តែសម្រាប់អ្នកដទៃផងដែរ៕